ەلوردانى دامىتۋدا «قالا ادام ءۇشىن» قاعيداتىن باسشىلىققا الامىز - پرەزيدەنت

استانا. قازاقپارات - مەملەكەت باسشىسى ەلوردانىڭ بولاشاق دامۋىنىڭ ماڭىزىنا توقتالدى، دەپ حابارلايدى قازاقپارات ءتىلشىسى.

«ۇلكەن كورسەتكىشتەر قالانىڭ ۇيلەسىمدى دامۋىمەن ۇنەمى سايكەس كەلە بەرمەيدى. مەنىڭ ويىمشا، مەگاپوليستەردىڭ تابىستى بولۋىنىڭ باستى كورسەتكىشى ونىڭ تۇرعىندارىنىڭ تۇرمىس ساپاسىمەن ولشەنۋگە ءتيىس. سوندىقتان ەلوردانى دامىتۋ جانە اباتتاندىرۋ كەزىندە ءبىز «ادام قالا ءۇشىن ەمەس، قالا ادام ءۇشىن» قاعيداتىن باسشىلىققا الامىز»، - دەدى قاسىم- جومارت توقايەۆ ەلوردادا ءوتىپ جاتقان استانانىڭ باۋىرلاس قالالار فورۋمىندا.

مەملەكەت باسشىسىنىڭ ايتۋىنشا، ادامعا باعدارلانعان مۇنداي ۇستانىم مۇلدە باسقا ستراتەگيالىق ماقساتتى كوزدەيدى.

«قالا اكىمدىگى، ەڭ الدىمەن، تۇرعىنداردىڭ مۇددەسى مەن قاجەتىن باسشىلىققا الادى. استانانىڭ بارشا تۇرعىنى مەن قوناقتارى ءۇشىن قالادا بارىنشا قولايلى ورتا قالىپتاستىرۋ - اسا ماڭىزدى ماسەلە. ءبىز بارىنە تەڭ مۇمكىندىك بەرىلەتىن قوعام قۇرۋ جولىن تاڭدادىق جانە وسى باعىتتا دامىپ كەلەمىز. سوندىقتان ءوزارا جاۋاپكەرشىلىك پەن ازاماتتىق ىنتىماقتاستىققا نەگىزدەلگەن ينكليۋزيۆتى دامۋعا ايرىقشا ءمان بەرەمىز»، - دەيدى پرەزيدەنت.

Astana Hub حالىقارالىق IT- ستارتاپتار تەحنوپاركى تەك ەلىمىزدىڭ عانا ەمەس، بۇكىل ايماقتىڭ سيفرلىق ترانسفورماتسياسىنا ەلەۋلى ۇلەس قوسادى.

«Intelligent Community Forum بەدەلدى حالىقارالىق ۇيىمىنىڭ مالىمەتى بويىنشا ەلوردا الەمدەگى ەڭ ينتەللەكتۋالدى قوعامداستىقتىڭ ءبىرى رەتىندە وزىق 21 شاھاردىڭ قاتارىنا ەندى. سونىمەن قاتار قالامىزدا ورتالىق ازياداعى ەڭ ءىرى Astana Hub حالىقارالىق IT- ستارتاپتار تەحنوپاركى قۇرىلدى. بۇل تەحنوپارك تەك ەلىمىزدىڭ عانا ەمەس، بۇكىل ايماقتىڭ سيفرلىق ترانسفورماتسياسىنا ەلەۋلى ۇلەس قوسادى»، - دەدى قاسىم- جومارت توقايەۆ.

وسى ورايدا پرەزيدەنت ەكولوگيا سالاسىنا ءاردايىم ايرىقشا كوڭىل ءبولىپ وتىرعانىن ايتتى.

«اتالعان ماسەلەدە ازاماتتاردىڭ ەكولوگيالىق مادەنيەتىنىڭ قالىپتاسۋى شەشۋشى مانگە يە. ءىرى قالالارداعى كوشەلەردىڭ قوقىستان تازا بولۋى تۇرعىنداردىڭ ازاماتتىق سانا- سەزىمى جوعارى ەكەنىن انىق كورسەتەدى. جاۋاپتى قالا تۇرعىنى دەگەنىمىز - بۇل، ەڭ الدىمەن، ءوز قالاسىنىڭ جانە ەلىنىڭ تاعدىرىنا بەيجاي قارامايتىن ادام»، - دەدى مەملەكەت باسشىسى.

«قۋاتتى قالالار - ەل ەكونوميكاسىن دامىتۋدىڭ قوزعاۋشى كۇشى. سوندىقتان ءبىز بۇل ماسەلەگە باسا ءمان بەرەمىز. وسىنداي جيىندار تاجىريبە الماسىپ، ءوزارا ءتيىمدى بايلانىستار ورناتۋعا جول اشادى. استاناعا ارنايى كەلىپ، فورۋمنىڭ جۇمىسىنا اتسالىسقان قوناقتارعا تاعى دا ريزاشىلىعىمدى بىلدىرەمىن. سىزدەردىڭ وي- پىكىرلەرىڭىز ءبىز ءۇشىن وتە ماڭىزدى. بۇل باسقوسۋ دوستىق قارىم- قاتىناستى نىعايتۋعا تىڭ سەرپىن بەرەرى ءسوزسىز. قالالارىمىز كوركەيە بەرسىن. بارشاڭىزعا باق- بەرەكە، تولاعاي تابىس تىلەيمىن. استانا كۇنى قۇتتى بولسىن!»، - دەدى قاسىم- جومارت توقايەۆ ەلوردادا ءوتىپ جاتقان استانانىڭ باۋىرلاس قالالار فورۋمىندا.