شەتەلدەگى قازاق بالالارى بۋرابايدا دەمالىپ جاتىر
بىلتىرعى جىلمەن سالىستىرعاندا، وقۋشى سانى ەكى ەسەگە ارتقان. ولارعا قازاقتىڭ سالت- داستۇرلەرى كورسەتىلىپ، ۇلتتىق ويىندارى ناسيحاتتالادى. نۇرگۇل بالا كۇنىنەن دومبىرا تارتادى. 10-نان استام ءان بىلەدى. بولاشاقتا قازاق ءتىلى مامانى بولۋدى ارماندايدى. ءبىر قىزىعى، ونەرلى ورەن بيىل حالىقارالىق بايقاۋعا قاتىسىپ، قىزىلورداداعى قورقىت اتا ۋنيۆەرسيتەتىنە گرانت ۇتىپ العان.
نۇرگۇل ولجابايەۆا، وقۋشى /وزبەكستان/:
- اتاجۇرتقا ايتار العىسىمىز وتە شەكسىز. شەكارادان اتتاعان كەزدە بىزدە ءبىر ىستىق سەزىم بولادى وتانعا دەگەن. ءتىپتى كوڭىلدەن جىلاپ جىبەرەتىندەي دارەجەدە بولعانبىز. ءبىز وزبەكستاندا تۇرعانىمىزبەن ءوزىمىزدىڭ قازاق مادەنيەتىمىزدى، سالت- ءداستۇرىمىزدى، ادەت- عۇرىپتامىزدى دامىتۋدان جالىقپاي كەلە جاتقان حالىقپىز.
دەمالۋعا كەلگەن بالعىنداردىڭ بارلىعى ءتۇرلى بايقاۋدىڭ جۇلدەگەرلەرى. وقۋشىلاردىڭ دەنى رەسەي، وزبەكستان مەن موڭعوليادان كەلگەن. ال بەلورۋسسيا مەن يراننان تەك ءبىر عانا وقۋشى بار. پۋياعا بۇل ولەڭدى اتاسى جاتتاتىپتى. پارسى تىلىندە ءبىلىم السا دا، ءوز ءتىلىن ۇمىتپاي، ءتۇرلى كىتاپ وقىپ تۇرادى ەكەن.
پۋيا پاۆيز، وقۋشى /يران/:
- بولاشاقتا ارينە مەن قازاقستان ورالۋ ويدا بار. ويتكەنى بۇل ءبىزدىڭ اتامەكەنىمىز. وسى جەرگە كەلىپ، ءبىلىم الىپ، قىزمەت ەتكىم كەلەدى.
دەمالىس ۋاقىتىندا وقۋشىلارعا ءتۇرلى ساباق ۇيىمداستىرىلادى. نەگىزگى ەكپىن الاشتانۋ مەن قازاقستان تاريحىنا بەرىلىپ وتىر. بيىل لاگەردەگى وقۋ باعدارمالاسىنا ءبىرقاتار وزگەرىستەر دە ەڭگىزىلگەن.
ديدار بولات، «وتانداستار» قورى پرەزيدەنتىنىڭ كەڭەسشىسى:
- وسى جىلى لاگەردىڭ باعدارلاماسى ەتنو بولدى. اعىلشىن ءتىلى جوق، تەك قانا قازاق ءتىلى. دومبىرا تارتۋ، الاشتانۋ، جاساندى ينتەلەكتىمەن جۇمىس ىستەۋ سياقتى جاڭاشىلدىقتار قوستىق. باعدارلامانى قازاق رۋحىن وياتۋ ءۇشىن اۋىستىردىق. وقۋشىلار 14 -شىلدەگە دەيىن دەمالادى. جالپى ەتنيكالىق قازاق بالالارىن قولداۋ تەك وسىمەن عانا شەكتەلمەيدى. جىل سايىن قازاقستاندىق جوعارعى وقۋ ورىندارىندا وزگە مەملەكەتتەردەگى قانداستارىمىز ءبىلىم الۋى ءۇشىن 6 مىڭ گرانت بولىنەدى.
ابزال ازامات ۇلى، ەۆگەني شينكورەنكو
www.24.kz
