شەتەل كومپانيالارى سۋ ۇنەمدەۋ جابدىقتارىن قازاقستاندا شىعارادى

استانا. قازاقپارات - اۋىل شارۋاشىلىعى ءمينيسترى ەربول قاراشوكەيەۆ ەلىمىزدە سۋ ۇنەمدەۋ تەحنولوگياسىن ەنگىزۋگە قاتىستى تۇسىنىك بەردى، دەپ حابارلايدى قازاقپارات ءتىلشىسى.

«وبلىستارداعى اكىمدىكتەردىڭ دەرەكتەرى بويىنشا بيىل 1,58 ميلليون گا سۋارمالى جەر وڭدەلگەن. بىلتىرعى الىنعان سۋ كولەمىن ەسكەرسەك، 1,58 ميلليون گا جەردى سۋارۋ ءۇشىن 11,4 ميلليارد تەكشە مەتر سۋ قاجەت بولادى. ونىڭ نەگىزگى ۇلەسى كۇرىش جانە جەم- ءشوپ داقىلدارىن سۋارۋعا پايدالانىلادى. 1 ميلليون 126 مىڭ گا نەمەسە ەگىستىكتىڭ 71 پايىزى جەرۇستى ادىسىمەن، 97,9 مىڭ گەكتارى كۇرىش القاپتارىنا سۋ جىبەرۋ ارقىلى سۋارىلادى، سونداي- اق 278,6 مىڭ گا الاڭدا نەمەسە 17,6 پايىزىندا زاماناۋي تامشىلاتىپ جانە جاڭبىرلاتىپ سۋارۋ جۇيەلەرى پايدالانىلادى» ، - دەدى ە. قاراشوكەيەۆ ۇكىمەت وتىرىسىندا.

وسى ورايدا ول سۋ ۇنەمدەۋ تەحنولوگيالارىن ەنگىزۋ بويىنشا جۇمىستارعا توقتالدى.

«بىرىنشىدەن، ينۆەستيتسيالىق سۋبسيديالاۋ اياسىندا فەرمەرلەردىڭ سۋ ۇنەمدەۋ تەحنولوگيالارىن ساتىپ الۋعا، سونداي- اق سۋ الۋ جانە بەرۋ جونىندەگى نەگىزگى ينفراقۇرىلىمدى جۇرگىزۋگە جۇمساعان شىعىندارىنىڭ %50 وتەلەدى. ەكىنشىدەن، ەلىمىزدە جوبالاردى ءوز قاراجاتى ەسەبىنەن ىسكە اسىرۋ مۇمكىندىگى بار ينۆەستورلاردى تارتۋ بويىنشا جۇمىس ىسكە اسىرىلىپ جاتىر. «ماسەلەن، يزرايلدىك «METZERPLAS» كومپانياسى وسى كۇزدە تامشىلاتىپ سۋارۋعا ارنالعان قۇبىر شىعاراتىن زاۋىتتى ىسكە قوسۋدى جوسپارلاپ وتىر. سونىمەن قاتار قىتايدىڭ VODAR كومپانياسى مەن تۇرىكتىڭ AFKO كومپانياسى جاڭبىرلاتقىش ماشينا شىعاراتىن زاۋىتتار اشۋدى جوسپارلاپ وتىر. ۇشىنشىدەن، سۋ بەرۋ جونىندەگى قىزمەتتەردىڭ قۇنىن سۋبسيديالاۋ جۇزەگە اسىرىلادى. مۇندا ءبىر تەكشە مەتر سۋعا بولىنەتىن سۋبسيديالاردىڭ مولشەرى تاريفتەردىڭ پايىزدىق قاتىناسىنا قاراي 50 پايىزدان 85 پايىزعا دەيىن سارالانعان تۇردە بەلگىلەنەدى»، - دەدى مينيستر.