ش ى ۇ- عا مۇشە ەلدەر مەملەكەت باسشىلارىنىڭ كەلەسى ءسامميتى استانادا وتەدى

استانا. قازاقپارات - شانحاي ىنتىماقتاستىق ۇيىمى جانىنان تۇراقتى وكىلدەر كەڭەسىن قۇرۋ جانە ولارعا مەملەكەتتەرىمىزدىڭ مۇددەسىن قورعاۋ قۇزىرەتىن بەرۋ ماڭىزدى دەپ سانايمىن.

بۇل تۋرالى ق ر پرەزيدەنتى قاسىم- جومارت توقايەۆ شىۇ ەلدەرى مەملەكەت باسشىلارىنىڭ كەڭەسىندە ايتتى، دەپ حابارلايدى قازاقپارات اقورداعا سىلتەمە جاساپ.

«بۇگىندە ش ى ۇ جاڭارۋ جولىنا باتىل قادام باستى. بۇل اناعۇرلىم مول مۇمكىندىكتەرگە جول اشادى. دامۋدىڭ جاڭا كەزەڭىندە ءبىزدىڭ جۇمىسىمىز بۇدان بىلاي ەسكىرگەن تاسىلدەرگە سۇيەنە المايدى. ش ى ۇ- نىڭ الەۋەتىن ارتتىرۋ جولىنداعى ورتاق ىستە ەكىجاقتى سيپاتتاعى پروبلەمالاردان ءوزىمىزدى مەيلىنشە اۋلاق ۇستاپ، بارلىق كۇش- جىگەرىمىزدى اراداعى ۋاعدالاستىقتاردى جۇزەگە اسىرۋعا جۇمىلدىرعان ءجون. حالىقتارىمىزدىڭ ۇزاقمەرزىمدى مۇددەسى ءۇشىن شىۇ اياسىندا ءاردايىم ءوزارا تۇسىنىستىك، ىنتىماقتاستىق نيەتى باسىم تۇرۋعا ءتيىس. شانحاي ىنتىماقتاستىق ۇيىمىنىڭ جاڭا دامۋ ستراتەگياسىن قابىلدايتىن ۋاقىت كەلدى دەپ ويلايمىن. قازاقستان اتالعان قۇجاتتىڭ جوباسىن ازىرلەدى جانە ونى الداعى ءتوراعالىق ەتۋ كەزىندە تانىستىرۋدى جوسپارلاپ وتىر»، - دەدى ق. توقايەۆ.

مەملەكەت باسشىسى اتاپ وتكەندەي، جاڭا ستراتەگيادا ءوزارا ىنتىماقتاستىعىمىزدىڭ اناعۇرلىم پەرسپەكتيۆتى باعىتتارى بويىنشا ش ى ۇ- نىڭ كۇن ءتارتىبىن كەڭەيتۋ كوزدەلگەن.

«ۇيىم قىزمەتىن ودان ءارى جەتىلدىرۋ جاڭا سىن- قاتەرلەرگە ءتيىمدى توتەپ بەرىپ، ش ى ۇ- نى زامان تالابىنا بەيىمدەۋ ءۇشىن ماڭىزدى قادام بولماق. وسى ماقساتقا قول جەتكىزۋگە ارنالعان قازاقستاننىڭ ۇسىنىستارىن ەسكەرە وتىرىپ، استانادا وتەتىن كەلەسى سامميتكە دەيىن شىۇ- نىڭ الەۋەتىن كۇشەيتۋ تۇجىرىمداماسىن قابىلداۋدى ۇسىنامىن»، - دەدى پرەزيدەنت.

«وزگە حالىقارالىق ۇيىمداردىڭ تاجىريبەسىنە سۇيەنە وتىرىپ، ش ى ۇ جانىنان تۇراقتى وكىلدەر كەڭەسىن قۇرۋ جانە ولارعا مەملەكەتتەرىمىزدىڭ مۇددەسىن قورعاۋ قۇزىرەتىن بەرۋ ماڭىزدى دەپ سانايمىن. ءادىل ءارى ۇيلەسىمدى كەلەشەك الەم تۋرالى ءبىزدىڭ ءوز كوزقاراسىمىز بولۋعا ءتيىس. ءوزارا جاۋاپكەرشىلىك پەن تىلەۋلەستىك نەگىزىندە ينكليۋزيۆتى دامۋ مەن جاسامپاز پروگرەسس جولىندا العا قاراي باتىل قادام باسۋىمىز كەرەك. ءتوراعالىق ەتۋ كەزەگىن قابىل الا وتىرىپ، ش ى ۇ كەڭىستىگىندەگى قاۋىپسىزدىك، بەيبىتشىلىك جانە وركەندەۋ ءىسىن ودان ءارى نىعايتا ءتۇسۋ ءۇشىن ۇيىمداعى مارتەبەسىنە قاراماستان بارلىق ەلمەن اراداعى بەلسەندى جانە تابىستى جۇمىستى جالعاستىرامىز. وسى ورايدا بارشاڭىزدى شانحاي ىنتىماقتاستىق ۇيىمىنىڭ قازاقستان ەلورداسى - استانادا وتەتىن كەلەسى سامميتىنە قاتىسۋعا شاقىرامىن»، - دەدى ق. توقايەۆ.