جاپون عالىمدارى العاش رەت ءتىس وسىرەتىن ءدارى ويلاپ تاپتى

استانا. قازاقپارات - جاپون عالىمدارى ادامدارعا ءتىس وسىرۋگە مۇمكىندىك بەرەتىن جاڭا ءدارى جاساۋدا جەتىستىكتەرگە جەتتى.

زەرتتەۋلەر كورسەتكەندەي، ادامدار ەندى ءۇشىنشى رەت تىستەرىن وسىرە الادى.

ءدارى تىشقاندارعا جاسالعان تاجىريبەلەردە ءتىستىڭ ءوسۋىن ىنتالاندىراتىن ءتيىمدى ەكەندىگى كورسەتىلگەن، دەپ جازادى باسىلىم.

«جاڭا تىستەردى ءوسىرۋ يدەياسى - ءاربىر ءتىس دارىگەرىنىڭ ارمانى. مەن اسپيرانت كەزىمدە وسىمەن اينالىستىم. مۇنى ىستەي الاتىنىما سەنىمدى بولدىم»، - دەدى وساكاداعى كيتانو مەديتسينالىق ينستيتۋتىنىڭ جەتەكشى عىلىمي قىزمەتكەرى كاتسۋ تاكاحاشي.

تاكاحاشيدىڭ زەرتتەۋ توبى ءتىس ءوسۋىن شەكتەيتىن USAG-1 پروتەينىنە نازار اۋداردى. بۇل اقۋىزدىڭ قىزمەتىن بلوكتاي الاتىن بەيتاراپتاندىراتىن انتيدەنە ازىرلەندى. ءدارى تىشقاندارعا سىنالعان كەزدە، جاڭا ءتىس شىنىمەندە ءوسىپ شىعاتىنىن دالەلدەدى.

قازىردىڭ وزىندە پرەپاراتتى ادامعا قولدانۋعا دايىنداۋ جۇمىستارى جۇرگىزىلىپ جاتىر. ەڭ الدىمەن، پرەپارات تۋا بىتكەن فاكتورلارعا بايلانىستى ءتىسىن تولىق جوعالتقان ناۋقاستارعا ارنالعان. بۇل «ادەنتيا» دەپ اتالادى.

«بولاشاقتا پرەپارات كەڭىرەك قولدانىلۋى مۇمكىن»، دەيدى زەرتتەۋشىلەر.

«كاريەس نەمەسە باسقا سەبەپتەرگە بايلانىستى تىستەردى ەمدەۋ مۇمكىن بولماعان كەزدە ءتىس ءتۇسىپ قالادى. سونىڭ كەسىرىنەن پروتەزدەردى نەمەسە يمپلانتتاردى ورناتۋعا ءماجبۇر بولادى. ءتىستى ءوسىرۋ قابىلەتى وزگەرىستى تۋدىرۋى مۇمكىن. قالاي بولعاندا دا، الداعى جىلدارى تىستەردى قالپىنا كەلتىرەتىن ءدارى پايدا بولادى دەپ ويلايمىز»، - دەيدى تاكاحاشي.

پرەپاراتتىڭ كلينيكالىق سىناقتارى 2024 -جىلدىڭ شىلدەسىنە جوسپارلانعان. عالىمدار 2030 -جىلعا دەيىن ءدارىنى جالپى قولدانىسقا دايىنداماقشى.

ايتا كەتۋ كەرەك، كەيبىر جانۋارلار، سونىڭ ىشىندە اكۋلالار مەن باۋىرىمەن جورعالاۋشىلاردىڭ كەيبىر تۇرلەرىندە ۇنەمى جاڭا ءتىس ءوسىپ تۇرادى. سونىمەن قاتار، ادام ومىرىندە ءتىس ەكى رەت قانا شىعادى