تۇركىستان وبلىسىندا ەكىگە ءبولىنىپ كەتكەن اۋىلدى بىرىكتىرۋ ماسەلەسى كوتەرىلدى

تۇركىستان. قازاقپارات - پارلامەنت ءماجىلىسىنىڭ دەپۋتاتى ۇلاسبەك سادىبەكوۆ كەنتاۋ قالاسىنا جۇمىس ساپارىمەن باردى، دەپ حابارلايدى قازاقپارات ءتىلشىسى.

تۇركىستان وبلىسىندا قۇسشى اتا دەگەن اۋىل بار. بۇگىندە ءبىر جولدىڭ بويىندا ورنالاسقان اۋىل ەكىگە ءبولىنىپ كەتكەن. ياعني جولدىڭ ءبىر بەتى كەنتاۋ قالاسىنا قاراسا، ەكىنشى جاعى ساۋران اۋدانىنا تيەسەلى. سوندىقتان ساۋران جاعىنداعى اۋىلدىڭ مۇعالىمى جالاقىسىنا قوسىمشا ەكولوگيالىق ۇستەمەاقى الادى. ال كەنتاۋعا قارايتىن مەكتەپتىڭ مۇعالىمدەرىنە مۇنداي مۇمكىندىك بەرىلمەگەن. ال ءبارىنىڭ جۇتىپ وتىرعانى - ءبىر اۋا.

ءماجىلىس دەپۋتاتى ۇلاسبەك سادىبەكوۆتىڭ كەنتاۋلىقتارمەن كەزدەسۋىنە ارنايى كەلگەن قۇسشى اتا اۋىلىنىڭ تۇرعىندارى اتالعان ماسەلەنى ءسوز ەتىپ، ەكىگە بولىنگەن اۋىلدى بىرىكتىرىپ بەرۋىن سۇرادى.

«ءبىزدىڭ اۋىلدا وزەكتى ماسەلەلەر كوپ. ال ونى شەشۋ ءۇشىن جولدىڭ ەكى بەتىندەگى اۋىلدى بىرىكتىرىپ، كەنتاۋ قالاسىنا قوسۋ كەرەك. بۇل ىسكە حالىقتا قارسى ەمەس. جۇرگىزىلگەن ساۋالنامادا جەرگىلىكتى تۇرعىنداردىڭ 90 پايىزى كەلىسىمىن بەرىپ وتىر»، - دەدى قوعامدىق قابىلداۋعا كەلگەن اۋىل تۇرعىنى ماۋلەن مۇساحانوۆ.

سونداي-اق حالىق قالاۋلىسى وتكىزگەن قابىلداۋدا قالا تۇرعىنى قىزتۋماس الداشۇكىروۆا ى. التىنسارين كوشەسى №11-ءۇيدىڭ اپاتتى جاعدايدا تۇرعانىن ءسوز ەتتى. جارىقتارىنىڭ ءجيى وشەتىنىن، سۋ مەن كارىز جۇيەسىنىڭ ەسكىرگەنىن، ءتىپتى كىرەبەرىستەگى كىرپىشتەرى قۇزدانىپ قۇلاۋعا اينالعانىن جەتكىزدى. اتالعان ماسەلەگە وراي رەسپۋبليكالىق بيۋدجەتتەن قارجى ءبولىنىپ، جوندەۋ جۇمىستارىن جۇرگىزىلسە دەگەن ۇسىنىسىن ايتتى.

ال كەنتاۋدىڭ قۇرمەتتى ازاماتى ميراش ءاشىروۆا م. اۋەزوۆ اتىنداعى №22-مەكتەپتىڭ ماسەلەسىن كوتەردى. بۇگىندە اتالعان مەكتەپتە وقۋشى سىيىمدىلىعى جەتپەي جاتىر. سوندىقتان ءبىلىم ورداسىنىڭ قاسىنا قوسىمشا عيمارات سالىنۋى قاجەت. وعان مەكتەپتىڭ اۋلاسىندا جەر جەتكىلىكتى.

قوعامدىق قابىلداۋدا اقىلى قوعامدىق جۇمىس اتقاراتىن جۇمىسشىلار جالاقىسىنىڭ ازدىعى ايتىلدى. ال جاسىل ەل جاساقتارىنىڭ اتىنان كەلگەن جاستار ەڭبەك جاساعىنا قوسىمشا قارجى ءبولىنىپ، جۇمىسشى جاستاردىڭ سانىن كوبەيتۋ كەرەكتىگىن ءسوز ەتتى.

ماسەلەلەرمەن مۇقيات تانىسقان ۇلاسبەك سادىبەكوۆ بارلىق ماسەلەنى ارنايى جازىپ الدى. الداعى ۋاقىتتا ايتىلعان جاعدايلاردى تەرەڭ زەرتتەپ، وڭ شەشىلۋىنە اتسالىساتىنىن جەتكىزدى.

مۇنان سوڭ، حالىق قالاۋلىسى قالاداعى №5-ج ە و جۇمىسىمەن تانىستى. بۇدان بولەك، جوندەۋدەن ءوتىپ جاتقان تۇرعىن ۇيلەردى كوردى. سونداي-اق قوعامدىق قابىلداۋدا تۇرعىندار ايتقان ى. التىنسارين كوشەسىندەگى №11-ۇيدە بولىپ، تۇرعىندارمەن كەزدەستى.

حالىق قالاۋلىسى سالا ماماندارىنا اتالعان جاعدايدى نازارعا الۋ كەرەكتىگىن تاپسىردى. ال تۋىنداعان ماسەلەلەردى پارلامەنت قابىرعاسىندا كوتەرىپ، ءتيىستى مينيسترلىكتەرگە جەتكىزەتىنىن ايتتى.