سايگۇلىك، كيىز ءۇي ءھام دومبىرا - قازاق مادەنيەتىنىڭ رامىزدەرى سلوۆاكيادا - فوتو
قويىلىم ورنى كەزدەيسوق ەمەس، سەبەبى ءاتۇستى پولو ءوز باستاۋىن كوشپەندىلەردىڭ كونە ويىندارىنىڭ ءبىرى - كوكپاردان الادى.
ايگىلى ماجار ءمۇسىنشىسى گابور ميكلوش سوكە جاساعان «كولوسس» اتتى ەۋروپاداعى ەڭ ءىرى 20 توننالىق شاۋىپ بارا جاتقان ات ءمۇسىنىنىڭ ەتەگىندە ءداستۇرلى قازاق كيىز ءۇي تىگىلدى.
كيىز ءۇي اينالاسىنداعى ەكسپوزيتسيادا - جىلقى جانە مال شارۋاشىلىعى، كيىز ءۇي تىگۋ ونەرى، دومبىرا تارتۋ ونەرى سەكىلدى قازاقتىڭ ەجەلگى قولونەرىنە قاتىستى اقپاراتتىق ستەندتەر قويىلعان.
قازاقستان اۋماعىندا بەس مىڭنان استام جىل بۇرىن العاش رەت جابايى جىلقىلار قولعا ۇيرەتىلىپ، جىلقى شارۋاشىلىعى قازاق حالقىنىڭ تۇرمىس سالتى مەن ماتەريالدىق جانە رۋحاني مادەنيەتىنە وراسان زور ىقپال ەتكەنى ايتىلدى.
كورمەنىڭ سلوۆاك كەلۋشىلەرى كوشپەندىلەردىڭ مەتال بالقىتۋدى، اربا دوڭگەلەگىن، ساداق پەن جەبە جاساۋدى تاريحتا العاش بولىپ ۇيرەنگەنىن ءبىلدى.
كوشپەندىلەردىڭ ەڭ ۇلى جاڭالىعىنىڭ ءبىرى كيىز ءۇي ەكەنى، ونىڭ كومەگىمەن كوشپەندىلەر التاي تاۋىنان باستاپ جەرورتا تەڭىزى جاعالاۋىنا دەيىنگى ەۋرازيانىڭ كەڭ دالاسىن يگەرگەنى ايتىلدى.
ەكسپوزيتسيا قوناقتارى كيىز ءۇي تاريحىمەن، ونىڭ جابدىقتارىمەن جانە يۋنەسكو دۇنيەجۇزى ماتەريالدىق ەمەس مادەني مۇراسىنىڭ قاتارىنا جاتاتىن بىرەگەي جاسالۋ شەبەرلىگىمەن تانىستى.
كيىز ءۇي ينتەرەرىن كىلەمدەر مەن بىلعارى پاننولار، ۇلتتىق كيىمدەر، كوشپەندىلەردىڭ ساۋىت-سايماندارى مەن مۋزىكالىق اسپاپتارى اشەكەيلەدى.
العاش رەت الاتاۋ بوكتەرىندە وسىرىلگەن، قازاقستاننىڭ تابيعي سيمۆولدارى - الما مەن قىزعالداقتارعا بولەك ستەند قويىلعان.
ەكسپوزيتسيانىڭ ورتالىق ورنى دەشتى قىپشاقتىڭ اتاقتى ۇلى، ورتاعاسىرلىق مىسىر مەن سيريانىڭ ۇلى بيلەۋشىسى سۇلتان ءاز- زاكىر بەيبارىسقا ارنالعان.
ونىڭ XIII عاسىردا كىشى ازيا مەن سولتۇستىك افريكانىڭ بەينەسىن قالىپتاستىرعان كورنەكتى اسكەري- ساياسي جەتىستىكتەرى ايتىلىپ ءوتتى.
ۇلتتىق دومبىرا كۇنىنە وراي جاس دومبىراشى ءامينا مامانوۆا، حالىق بيشىلەرى ءۇميدا بولاتبەك پەن دايانا چۋردىڭ ونەرلەرى كورسەتىلىپ، دومبىرا ونەرىنىڭ قايتالانباس تاريحىنان سىر شەرتەتىن بۋكلەتتەر مەن قازاقتىڭ تاڭدامالى كۇيلەرى جيناقتالعان ديسكىلەر تاراتىلدى.
استانا كۇنىنە ارنالعان فوتوكورمە دە سلوۆاكيا جۇرتشىلىعىنىڭ ۇلكەن قىزىعۋشىلىعىن تۋدىردى.
فوتوسۋرەتتەردە بەينەلەنگەن «بايتەرەك»، «حان- شاتىر»، «ماڭگىلىك ەل» سالتانات اركاسى جانە كوشپەندىلەردىڭ باسقا دا ساۋلەتتىك نىشاندارى ۇلى دالاداعى ەجەلگى داستۇرلەر ساباقتاستىعى مەن كوشپەلى وركەنيەتتەرىنىڭ ىلگەرىلەۋىن كورسەتەدى.
