قازاق بالالارى ۇلى بريتانيادا ۇلتتىق قۇندىلىقتارىمىزدى ناسيحاتتادى

لوندون. قازاقپارات - ۇلى بريتانيا مەكتەپتەرىندە ۇلتتار كۇنى اتالىپ ءوتىپ جاتىر. وقۋشىلار سىنىپتاستارىنا ءوز مەملەكەتتەرى تۋرالى اقپارات بەرىپ، سالت-داستۇرلەرىمەن تانىستىرىپ جاتىر.

اتا-اناسىمەن لوندوندا ۋاقىتشا تۇرىپ جاتقان قازاق بالالارى دا وسىنداي ءبىر شاراعا قاتىسىپ، ۇلتتىق قۇندىلىقتارىمىزدى ناسيحاتتادى، دەپ حابارلايدى قازاقپارات ءتىلشىسى.

ۇلى بريتانيا مەكتەپتەرىندەگى وقۋ جىلى شىلدەنىڭ اياعىندا عانا بىتەدى. سوڭعى توقسانداعى ايتۋلى شارالاردىڭ ءبىرى - ۇلتتار كۇنى.

بۇل كۇنى وقۋشىلار تاڭەرتەڭنەن ۇلتتىق كيىمدەرىن كيىپ، سىنىپتاستارىنا تۋعان جەرلەرى تۋرالى اقپارات بەرەدى.

ساباعى اياقتالعان سوڭ اۋلاعا شىعىپ، اتا-انالارىمەن بىرگە داستارحان جايادى.

«باۋىرساق؟ ءدامى ەرەكشە ەكەن. راقمەت. ماعان قاتتى ۇنادى. بۇرىن- سوڭدى مۇنداي عاجاپ نان جەپ كورمەدىم. ۇلتتىق كيىمدەرىڭىزدى كورىپ تە ءتانتى بولدىم»، - دەيدى سومالي ازاماتى سوفيا حاسان.

كاۋسار مەن الماسبەك - اتا-اناسىنىڭ جۇمىس بابىمەن لوندوندا ۋاقىتشا تۇرىپ جاتقان قازاقستاندىق بالالار.

ولار حيۋ-ميددلتون اتىنداعى باستاۋىش ءبىلىم بەرۋ مەكەمەسىندە بەسىنشى جانە التىنشى سىنىپتاردا وقيدى.

مەكتەبىندەگى جالعىز قازاق ۇلتىنىڭ وكىلدەرى. اعايىندىلار «بالاپان» تەلەارناسىنان شىعاتىن «ميسس كاۋسار» حابارىنىڭ جۇرگىزۋشىلەرى.

كوگىلدىر ەكراننان قازاق بالالارىنا اعىلشىن ءتىلىن ۇيرەتسە، لوندونداعى شەتەلدىكتەرگە تۋعان جەرىن ناسيحاتتاپ ءجۇر.

«ۇلتتىق كيىمدەرىڭىزدىڭ ماتاسى مەن ويۋ- ورنەگى وتە ۇنادى. داستۇرلەرىڭىزدى تاماشا دارىپتەيدى ەكەنسىزدەر. مەن بۇعان دەيىن ەلدەرىڭىزدە ەشقاشان بولعان جوقپىن. ءبىراق قازاقستاننىڭ المانىڭ وتانى ەكەنىن جانە بۇل جەمىس ءتۇرىن بۇكىل الەمگە تاراتقان مەملەكەت ەكەنىن بىلەمىن»، دەيدى انگولا ازاماتى حەلەنا مەلو.

ۇلى بريتانيا - كوپ ۇلتتى جانە ءار ءناسىلدى مەملەكەت. مۇندا نەگىزىنەن اعىلشىن، شوتلاند، يرلاند جانە ۋەلس حالقى مەكەندەيدى.

ولاردان بولەك بۇرىنعى وتار مەملەكەتتەرىنەن قونىس اۋدارعانداردىڭ ۇرپاقتارى جانە وسىندا جۇمىس بابىمەن كەلگەندەر تۇرادى.

ءتىلى، ءدىنى جانە داستۇرلەرىنىڭ ساقتالۋىنا ەرەكشە ءمان بەرىلەدى.