كورەيادان تۇلكىباسقا كەلىن بولىپ تۇسكەن سۋدجين باۋىرساق ءپىسىرىپ، ەت اسۋدى ۇيرەنىپ الدى - فوتو

تۇركىستان. قازاقپارات - تۇركىستان وبلىسىنا كەلىن بولىپ تۇسكەن كورەي قىزى باۋىرساق ءپىسىرىپ، ەت اسۋدى ۇيرەنىپ الدى، دەپ حابارلايدى قازاقپارات ءتىلشىسى.

ساكەن مەن سۋدجين ليدىڭ وتاۋ قۇرعانىنا ەكى ايعا جۋىق بولدى. كورەي قىزى تۇلكىباسقا كەلىن بولىپ تۇسكەن سوڭ قازاقى داستۇرمەن بەتاشار ءوتتى.

ەكى جاستىڭ نەكەسى دە مەشىتتە قيىلدى. قازىر كارىس كەلىن اتاسى مەن ەنەسىنە ءدامدى اس ازىرلەپ، سالەم سالۋدى ءتاپ-ءتاۋىر مەڭگەرىپ العان.

قازاق ءتىلىن ەندى ۇيرەنىپ ءجۇر. سوندىقتان، كوپشىلىكپەن سويلەسكەندە جولداسى ساكەن اۋدارماشىلىق جاسايدى.

«كەلىنىم كۇندە تاڭەرتەڭ سالەم سالاتىن. سودان مەن توقتاتىپ تاستادىم. قازىر ەكى-ءۇش كۇن قىدىرىپ كەلگەندە عانا سالەم سالادى. سوعان ۇيرەتتىك. ال، قالاعا قىدىرىپ كەلگەندە اپاسىن قۇشاقتاپ، ساعىنعانىن سەزدىرەدى»، - دەيدى اتاسى باۋىرجان ماقۇلبەكوۆ.

ساكەن كورەيادا 4 جىلعا جۋىق جۇمىس ىستەدى. سول جاقتا جۇرگەندە سۋدجين ليمەن تانىسقان.

كوپقاباتتى ۇيدە تۇراتىندىقتان اكە-شەشەسىمەن دە كەزدەسىپ ءجۇرىپتى. تانىستىق سوڭى ماحابباتقا ۇلاستى.

سودان كورەي قىزىن جار ەتىپ العىسى كەلەتىنىن ايتىپ، جۇرەگىن ۇسىندى. اتا-اناسىنىڭ الدىنان ءوتتى.

كورەي جاعى بۇل ۇسىنىسقا توسىرقاپ قالعانىمەن كەيىننەن ەكى جاستىڭ باقىتى ءۇشىن كەلىسىمىن بەردى.

ال، تۇلكىباستىقتار ۇلىنىڭ وڭتۇستىك كورەيادان كەلىن اكەلە جاتقانىنا قاتتى قۋاندى.

«بالام قوڭىراۋ سوعىپ، كەلىن ەكەۋىنە بيلەت الىپ قويعانىن ايتتى. جاس ەمەس قوي، شەشىمىنە قارسى بولمادىق. قازىر كەلىنىمىزدى ىزدەپ وتىرامىز. ەكى-ءۇش كۇن قالاعا كەتسە ساعىنىپ قالامىز»، - دەيدى قاريا.

سۋدجين ليگە العاشقىدا تۇلكىباستىڭ اۋا رايى ىستىق كورىنگەن. باسى اۋىرىپ، مازاسىزدانعان. دەگەنمەن قازىر ۇيرەنىپ قالدى.

اق ورامالىن باسىنان تاستامايدى. شالبار كيۋ دەگەندى دە قۇپ كورمەيدى.

شايىن قويىپ، اسىن ازىرلەپ، اتا-ەنەسىنە بايەك بولىپ ءجۇر. ءتىپتى، قازانعا اسىلعان ەتتى دە ءدامدى ەتىپ پىسىرەدى.

سورپاسىنا دەيىن بولەك دايىنداپ، ايران قوسىپ داستارحانعا اكەلەدى. تەك سيىر ساۋۋعا ەنەسى ءالى رۇقسات ەتپەپتى.

«ءبىر عانا سيىرىمىز بار. ونى ۇيدەگى وزگە كەلىندەر-اق ساۋىپ الادى. سوندىقتان وعان رۇقسات ەتپەدىك»، - دەيدى ەنەسى.

جالپى سۋدجين لي كىشكەنتاي بۇلدىرشىندەردى جاقسى كورەدى. قايىناعالارى مەن ابىسىندارىنىڭ بالالارىن ويناتىپ، سولارمەن كوپ سەرۋەندەيدى.

العاشقىداعى كوبىنە كۇرىش پەن اشتى تاعامداردى جەگەندى ۇناتاتىن. قازىر تالعامايدى.

«كەلىنىمىزدىڭ قۇجاتتارىن رەتتەۋ جاعى قيىندىق تۋدىرىپ جاتىر. ءتىپتى «دەپورت» جاساپ جىبەرە مە دەپ ۋايىمداپ وتىرمىز. سەبەبى، كورەيادان ءبىراز قۇجاتتار الدىرىپ وسىندا تىركەۋىمىز قاجەت. سوعان ەلشىلىكتەن ۇلكەن كومەك بولسا دەگەن ءوتىنىشىمىز بار. بارلىعى رەتتەلگەن سوڭ كورەيادان قۇدالاردى شاقىرىپ، ۇلان-اسىر توي جاساۋدى جوسپارلاپ وتىرمىز»، - دەيدى باۋىرجان ماقۇلبەكوۆ.