توڭازىتقىشتى بۇزاتىن نەگىزگى قاتەلىكتەر

استانا. قازاقپارات - توڭازىتقىش قىمبات تۇرمىستىق تەحنيكاعا جاتادى. ونى پايدالانۋ قاراپايىم، ءبىراق ەگەر ونى پايدالانۋ ەرەجەلەرىن بىلمەسەڭىز، قۇرىلعىنى بۇزىپ الۋىڭىز مۇمكىن. توڭازىتقىشتى قانداي قاتەلىكتەر بۇزادى؟

قانداي سەبەپتەرمەن شەبەرگە ءجيى جۇگىنەدى؟

توڭازىتقىشتىڭ اقاۋلارىن تۋدىراتىن نەگىزگى فاكتورلار:

. دۇرىس ەمەس پايدالانۋ؛

. الدىن الۋ شارالارىن جاساماۋ؛

. بولشەكتەردىڭ توزۋى؛

. فرەوننىڭ تابيعي اعۋى؛

. ۇقىپسىز ارەكەت.

توڭازىتقىشتى پايدالانۋداعى نەگىزگى قاتەلىكتەر

توڭازىتقىشقا تاماقتى ىستىق كۇيىندە سالۋ

ىستىق جانە جىلى تاعامداردى توڭازىتقىشقا قويۋعا بولمايدى. ولاردى توڭازىتقىشقا سالماس بۇرىن الدىمەن سۋىتىپ الۋ كەرەك. ەگەر توڭازىتقىشقا تاماقتى ىستىق كۇيىندە ءجيى سالساڭىز، كومپرەسسورعا شامادان تىس كۇش تۇسىرەسىز جانە ول ەرتە مە، كەش پە شىداماي، بۇزىلادى.

تەمپەراتۋرالىق رەجيمنىڭ بۇزىلۋى

جوعارعى سورەلەرگە ۇلكەن ىدىستاردى قويۋ ارقىلى ءسىز تەمپەراتۋرا رەجيمىن تەڭەستىرۋگە ارنالعان اۋا اينالىمىنا كەدەرگى كەلتىرەسىز. رەجيم بۇزىلعان كەزدە ءار ءتۇرلى تەمپەراتۋرالى ايماقتار پايدا بولادى، بۇل تەحنيكاعا دا، ونىمدەرگە دە ناشار اسەر ەتەدى.

مۇزداتقىشتى دۇرىس پايدالانباۋ

مۇزداتقىشتى پايدالانۋدا كوپشىلىك نەگىزگى ەكى قاتەلىك جىبەرەدى. ءبىرىنشىسى - مۇزداتقىشتى قاتتى تولتىرىپ تاستاۋ. ەكىنشىسى - دۇرىس ەمەس تەمپەراتۋرا قويۋ، اسىرەسە، جازدا. ەگەر ءسىزدىڭ مۇزداتقىشىڭىز جازدا ماكسيمۋم جۇمىس ىستەسە، كومپرەسسور دا ماكسيمۋم جۇمىس ىستەيدى. بۇل قارقىنمەن ول تەزىرەك توزادى.

ارتىق ىلعال

بۇل توڭازىتقىشتاردىڭ ەڭ ۇلكەن جاۋى. ول توڭازىتقىشتىڭ ەسىگىن اشقاندا نەمەسە ىشىنە جىلى زاتتاردى سالعاندا كوندەنسات تۇرىندە پايدا بولادى. سونداي-اق، ءجيى كەزدەسەتىن قاتەلىك - توڭازىتقىشتى دىمقىل شۇبەرەكپەن تازالاۋ.

ىلعال توڭازىتقىشقا زيان، سەبەبى ول توڭازىتقىشتىڭ قابىرعاسىندا مۇز بولىپ قاتىپ قالادى، بۇل جەلدەتۋ جۇيەسىنىڭ قالىپتى جۇمىس ىستەۋىنە كەدەرگى كەلتىرەدى.

رادياتوردىڭ لاستانۋى

رادياتور نەمەسە كوندەنساتور - ءار توڭازىتقىشتاعى ماڭىزدى بولىك. ول جىلۋ وتكىزگىش ءرولىن اتقارا وتىرىپ، لاستىق پەن شاڭ جينايدى. ادەتتە، ءبىز ونى كورمەيمىز، ويتكەنى ول توڭازىتقىشتىڭ ارتقى جاعىندا ورنالاسقان، ءبىراق ونى جىلىنا 2 رەت تازالاۋ كەرەك.

ۋاقىتىندا مۇزدى جىبىتپەۋ

ەگەر مۇزداتقىشتىڭ قابىرعالارىندا مۇز قاباتى 1 سانتيمەتردەن اسسا، بۇل ءجىبىتۋ كەرەگى جايلى بەلگى. بۇل پروتسەدۋرا نۇسقاۋلىققا سايكەس جىلىنا 1-2 رەت جۇرگىزىلۋى كەرەك.

ول ءۇشىن توڭازىتقىشتى ءوشىرىپ، ىشىنەن ءبارىن الىپ تاستاڭىز جانە مۇزدىڭ ەرۋىنە مۇمكىندىك بەرىڭىز. مۇزدى ۇرىپ الۋعا بولمايدى، ول وزدىگىنەن ەرۋى كەرەك.

ەسىك تىعىزداعىشىنىڭ توزۋى

بۇل قاراپايىم ديزاين ەلەمەنتى ماڭىزدى ءرول اتقارادى. ويتكەنى، ەگەر تىعىزداعىش ءوز فۋنكتسيالارىن ورىنداماسا، ىشكە اۋا كىرەدى. ال ول توڭازىتقىشتىڭ ەرتەرەك ىستەن شىعۋىنا اكەلەدى. توڭازىتقىشتى جوندەۋدەن گورى تىعىزداعىشتى اۋىستىرۋ ارزانعا شىعاتىنىن ۇمىتپاڭىز.

تىعىزداعىشتىڭ جاقسى ۇستايتىنىن ءتۇسىنۋ ءۇشىن توڭازىتقىشتىڭ ىشىنە قولشام قويىپ، ەسىكتى جابىڭىز. ەگەر جارىق تۇسسە، تىعىزداعىش گەرمەتيكالىق ەمەس. مۇنى قاراڭعى ۋاقىتتا جاساۋ كەرەك.