جامبىل وبلىسىندا «اتا مەن نەمەرە» مونۋمەنتى اشىلدى

تاراز. قازاقپارات - جامبىل وبلىسىنىڭ بايزاق اۋدانىنداعى ءمادىمار اۋىلىندا ۇلتتىق ناقىشقا نەگىزدەلگەن ەرەكشە مونۋمەنت بوي كوتەردى.

اۋىلعا مۇنداي ەرەكشە مونۋمەنتتى مەكتەپ بىتىرگەنىنە 45 جىل تولعان تۇلەكتەر تارتۋ ەتتى، دەپ حابارلايدى قازاقپارات ءتىلشىسى.

اۋىلدىڭ اجارىن ايشىقتاي تۇسكەن مونۋمەنتتىڭ جالپى قۇنى 1 جارىم ميلليون تەڭگەنى قۇرايدى. مونۋمەنت اۆتورى - ءمۇسىنشى سۇڭعات قوجاعۇلوۆ قازاقى ويۋ- ورنەك تۇرىندە پىشىندەلگەن ءپالساپالىق تۋىندىنى اتا مەن نەمەرە تابيعاتىنا ۇتىمدى ۇشتاستىرا بىلگەن.

جالپى، بۇل اۋىل مەكتەپ تۇلەكتەرىنىڭ العاشقى دا، سوڭعى دا تارتۋى ەمەس. اۋىلعا 1974 -جىلعى ازاماتتار «Street Workout» - تى پايدالانۋعا بەرسە، 1972 -جىلى تۋعان ازاماتتار ءمادىمار مەشىتىنە ەۋرو قاقپا ورناتقان. 1982 -جىلعى تۇلەكتەر مەشىتكە 100 ادامدىق باستىرما، ودان كەيىنگىلەر پەش سوعىپ، شاتىر (پالاتكا) سىيلاعان. 1986 -جىلعى ازاماتتار قورىم باسىنا 3 باستىرما ورناتسا، 1966 -جىلعى ازاماتتار «العاشقى مەحانيزاتورلار» اللەياسىنا ەۋرو قاقپا سالعان.

مونۋمەنتتىڭ اشىلۋى بارىسىندا يگى ىسكە باستاماشى بولعان تۇلەكتەرگە اۋىل اكىمىنىڭ اتىنان العىس حات تابىستالىپ، قاريالار اق باتاسىن بەردى.

بۇعان دەيىن تارازدا قالامگەر ءالديحان قالدىبايەۆتى ەسكە الۋعا ارنالعان مەموريالدىق تاقتا اشىلعانىن جازعان بولاتىنبىز.