باس ءمۇفتي دىندەگى ورامال ماسەلەسى تۋرالى پىكىر ءبىلدىردى
«قازىر دىنگە بەت بۇرىپ، نامازعا كەلگەن، حيدجاپ كيگەن ونەر ادامدارى، اقىندار، قوعام بەلسەندىلەرى ارنايى ءدىني ءبىلىمى بولماسا دا بلوگەر بولىپ، الەۋمەتتىك جەلى ارقىلى كوپ ەلگە اقىل ايتىپ ءجۇر. ءتىپتى ءداستۇرلى دىنگە جات ءپاتۋالار، تۇجىرىمدار ايتىلىپ قالىپ جاتادى. وسىعان ءبىر باقىلاۋ بار ما؟ ارنايى ۇيىمدار قاداعالاي ما؟»، - دەپ سۇرادى جوبا اۆتورى.
اۋەلى ناۋرىزباي قاجى حيدجاپ دەگەن ءسوزدىڭ ورنىنا ورامال ۇعىمىن قولدانۋ ورىندى ەكەنىن ايتتى.
«ءسىز حيدجاپ دەپ قالدىڭىز. قازاقشاسى ورامال عوي. ءبىز ايەل بالاسىنىڭ باس كيىمىن ورامال دەپ ايتامىز. قازاق حالقىنىڭ كەلىن تۇسكەندە باسىنا ورامال سالاتىن سالتى بار. وسى ورامالعا قاتىستى ايتساق، مۇسىلمان دىنىندە ايەل بالاسىنىڭ ورامالمەن ءجۇرۋى - نەگىزگى شارتتاردىڭ ءبىرى. سوندىقتان ورامال تاققان كەز كەلگەن قىزدى سىيلايمىز، قادىرلەيمىز. كەيبىر ورامال كيگەن قىزداردىڭ قاتەلىگىن بۇكىل ورامال كيگەن قاۋىمعا جابۋعا بولمايدى. انالارىمىز ءارقاشان ورامالىن باسىنان تاستاماعان. قازىر دە ونداي انالار جەتەرلىك. ورامال تۋرالى ايتقان كەزدە وسى جاعىن ەسكەرۋ كەرەك دەپ ويلايمىن»، - دەدى ق م د ب ءتوراعاسى.
باس ءمۇفتي ءدىني ماسەلەگە ءپاتۋا ايتۋ كولدەنەڭ كوك اتتىنىڭ قۇزىرىنداعى شارۋا ەمەس ەكەنىن باسا ايتتى.
«جالپى ءپاتۋا بەرۋ - جاۋاپكەرشىلىگى وتە جوعارى دۇنيە. سوندىقتان ءپاتۋا بەرۋدە ادام وتە ساق بولۋ كەرەك. كەز كەلگەن ادامنىڭ الەۋمەتتىك جەلىگە شىعىپ، «مىناۋ بولادى»، «مىناۋ بولمايدى» دەپ سويلەۋى وتە قيىن ماسەلە. ارينە، ءدىندار ادامدار كىتاپقا سۇيەنەدى. «ەكى مولدا تالاسسا، داۋدى كىتاپ شەشەدى»، - دەگەن كەرەمەت ءسوز بار قازاقتا. ياعني، ءپاتۋا شاريعي نەگىزدە بەرىلۋ كەرەك. يسلام دىنىندەگى سۇراققا جاۋاپ بەرۋشى كەز كەلگەن ادام قۇرانمەن، نەمەسە پايعامبار اياتىمەن، عالىمداردىڭ بەرگەن ءپاتۋاسى ارقىلى جاۋاپ بەرۋ كەرەك. ونداي سىلتەمەلەردى بىلمەسە، ەسىندە ساقتاعانى ارقىلى ءپاتۋا ايتۋدان ساق بولعانى كەرەك. ەستە ساقتاعان دۇنيەنىڭ ءبىر ماسەلەسى ۇمىتىلىپ قالسا، بۇرمالانىپ كەتۋى مۇمكىن»، - دەدى ناۋرىزباي قاجى تاعان ۇلى.
سۇحباتتىڭ جازباشا نۇسقاسىن مىنا جەردەن كورۋگە بولادى.
اۆتور:
ەسىمجان ناقتىباي
