قۇرباندىق شالۋ جانە وزگە دە وزەكتى ماسەلەلەر بويىنشا سۇراقتارىنا تاۋلىك بويى جاۋاپ بەرەدى

استانا. قازاقپارات - ەلوردا اۋماعىندا قۇرباندىق شالۋعا ارنالعان بەس ورىن بەلگىلەندى. بۇل تۋرالى ءدىن ىستەرى جونىندەگى باسقارمانىڭ باسشىسى نۇرداۋلەت ءالمۇحانوۆ ايتتى، دەپ حابارلايدى قازاقپارات ءتىلشىسى.

«2023 -جىلى قۇربان ايت مەرەكەسى 28-30-ماۋسىم ارالىعىندا وتەدى. قازاقستان مۇسىلماندارى ءدىني باسقارماسىنىڭ اقپاراتىنا سايكەس، قالا مەشىتتەرىندە 28-ماۋسىم كۇنى ساعات 6:00 دە ايت نامازى وقىلادى. قالا تۇرعىندارىنا ءتيىستى جاعداي جاساۋ ماقساتىندا قالاداعى قوعامدىق كولىكتەر تاڭعى ساعات 5:00 دەن باستاپ جۇرەدى»، - دەدى ن. ءالمۇحانوۆ استانا قالاسىنىڭ كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ ايتۋىنشا، ەلوردا اۋماعىندا قۇرباندىق شالۋعا ارنالعان بەس ورىن بار.

استانا قالاسىندا بەكىتىلگەن ورىنداردا قۇرباندىق شالۋ ساعات 8:00 دەن 18.00 گە دەيىن جۇزەگە اسىرىلادى.

حالىقتىڭ قۇرباندىق شالۋ جانە وزگە دە وزەكتى ماسەلەلەر بويىنشا سۇراقتارىنا تاۋلىك بويى «109» Call ورتالىعى جاۋاپ بەرەدى.

استانا قالاسىنىڭ سانيتاريالىق- ەپيدەميولوگيالىق باقىلاۋ دەپارتامەنتى قۇربان ايت كەزىندە قالا اۋماعىندا سانيتارلىق باقىلاۋ مەن قاداعالاۋدى كۇشەيتەدى. بولىنگەن مال سويۋ پۋنكتەرىندە سانيتاريالىق تالاپتاردىڭ ساقتالۋىن سانيتاريالىق جانە ۆەتەريناريالىق قىزمەت ماماندارى قامتاماسىز ەتەدى.