قازاقستاننىڭ رەسەيمەن كوپجاقتى ىنتىماقتاستىقتى ودان ءارى نىعايتۋ ۇستانىمىن راستايمىن - توقايەۆ
بۇل تۋرالى پرەزيدەنتتىڭ ب ا ق سالاسىنداعى سىيلىعى مەن گرانتتارىن تاپسىرۋ كەزىندە مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«وتاندىق جۋرناليستەردىڭ الدىندا شەتەلدە جانە دە ارينە، ءبىزدىڭ گەوساياسي توڭىرەگىمىزدە ورىن الىپ جاتقان وقيعالاردى شىنايى بايانداۋدا جاۋاپتى مىندەت تۇر. سىزدەر جالپى بۇل مىندەتتى تابىستى ورىنداپ جۇرسىزدەر. ماسەلەن، تاياۋدا رەسەيدە بولعان الاڭداتارلىق وقيعانى جاريالاۋ كەزىندە سولاي بولدى. ءبىزدىڭ ازاماتتارىمىز كوتەرىلىس ارەكەتىن شىن مانىندە ۇلكەن الاڭداۋشىلىقپەن قابىلدادى. بۇل تۇسىنىكتى دە. ويتكەنى، قازاقستان مەن رەسەي اراسىندا الەمدەگى ەڭ ۇزىن مەملەكەتتىك شەكارا بار. ءبىز ءبىرىڭعاي ەكونوميكالىق كەڭىستىكتە تۇرمىز. ءبىزدى مىڭداعان گۋمانيتارلىق بايلانىس پەن قارىم-قاتىناس بىرىكتىرەدى. باستاپقى كەزدە- اق مەنىڭ تاراپىمنان رەسەي فەدەراتسياسى پرەزيدەنتىمەن تەلەفونمەن اڭگىمە بارىسىندا ونىڭ كونستيتۋتسيالىق ءتارتىپ پەن زاڭدىلىقتى ساقتاۋ جانە نىعايتۋعا باعىتتالعان ءىس- ارەكەتىنە تولىقتاي قولداۋ بولاتىنى مالىمدەلدى. رەسەي مەملەكەتىنىڭ الەۋەتى مەن ونىڭ جالپىۇلتتىق كوشباسشىلىق تۇلعاسىن ەسكەرە وتىرىپ، ەشقانداي كۇدىك بولعان جوق»، - دەدى قازاقستان پرەزيدەنتى.
مەملەكەت باسشىسى ءتىپتى رەسەي پرەزيدەنتىمەن الداعى كۇزدە بولاتىن ساپارى دا تالقىلانعانىن اتاپ ءوتتى.
«بۇگىن دە مۇمكىندىكتى پايدالانا وتىرىپ، قازاقستاننىڭ رەسەيمەن ۇزاقمەرزىمدى جانە تۇراقتى ستراتەگيالىق ارىپتەستىك فورماتىنداعى كوپجاقتى ىنتىماقتاستىقتى ودان ءارى نىعايتۋعا قاتىستى قاعيداتتى ۇستانىمىن راستايمىن. مۇنداي ۇستانىم حالقىمىزدىڭ مۇددەسىنە تولىق سايكەس كەلەتىنىنە سەنىمدىمىن»، - دەدى قاسىم-جومارت توقايەۆ.
