كاسىپكەرلەر حالىققا ارنالعان كومىردى شەتەلگە ساتىپ جاتىر - مينيستر

استانا. قازاقپارات - يندۋستريا جانە ينفراقۇرىلىمدىق دامۋ ءمينيسترى مارات قارابايەۆ كومىر تاپشىلىعى مەن ونىڭ باعاسىنا پىكىر ءبىلدىردى، دەپ حابارلايدى قازاقپارات ءتىلشىسى.

«ەلىمىزدە 110 ميلليون توننا كومىر وندىرىلەدى. ال حالىقتىڭ تۇتىنۋىنا 9,3 ميلليون توننا كومىر قاجەت. ياعني جىل سايىن 10 ميلليون توننانىڭ كولەمىندە كومىر كەرەك. حالىققا جەتكىزىلەتىن كومىردىڭ باعاسى تومەن. ەكسپورتتاعى باعاسىمەن سالىستىرعاندا 5-6 ەسە تومەن. حالىققا بارىپ جاتقان كومىردى كەيبىر كاسىپكەرلەر الىپ، ونى شەتەلگە ساتىپ جاتىر. وزبەكستانعا، قىرعىزستانعا ساتۋدا. سونى بولدىرماس ءۇشىن ەلىمىزدەن اۆتوموبيلمەن كومىردى شەتەلگە شىعارۋعا تىيىم سالدىق»، - دەدى مارات قارابايەۆ ۇكىمەت وتىرىسىنان كەيىن تىلشىلەردىڭ سۇراعىنا جاۋاپ بەرە تۇرىپ.

ءمينيستردىڭ ايتۋىنشا، كاسىپكەرلەر كومىردى سىرت ەلگە شىعارۋدىڭ باسقا جولىن تاپقان.

«ەندى ولار كومىردى كولىكپەن پويىزعا جەتكىزىپ، شەتەلگە پويىزبەن شىعارىپ جاتىر. ماسەلە وسىندا. كومىردى ەرتەرەك جاز ۋاقىتىندا الۋ كەرەك»، - دەيدى ول.