وسكەمەندە جىلۋ مەن سۋ باعاسى قىمباتتايدى
ش ق و تابيعي مونوپوليالاردى رەتتەۋ دەپارتامەنتى مەن وڭىرلىك ساراپتاۋ كوميسسياسى «وسكەمەن جىلۋ جەلىلەرى» ا ق مەن «وسكەمەن سۋ ارناسى» كوممۋنالدىق كاسىپورنىنىڭ وتىنىشتەرىن قارادى. ەندى الداعى شىلدە ايىنىڭ 1 ىنەن باستاپ قالا تۇرعىندارى ءۇشىن كوممۋنالدىق قىزمەتتەر اقىسى 10 پايىزعا كوتەرىلەدى. بۇل قاراجات جىلۋ جەلىلەرىنىڭ، سۋمەن جابدىقتاۋ جانە كارىز جۇيەسىنىڭ ءبىرقاتار ۋچاسكەسىن جوندەۋگە مۇمكىندىك بەرمەك.
«ماماندار كاسىپورىنداردان، ونىڭ ىشىندە وسكەمەن جانە سوگرا جىلۋ ەلەكتر ورتالىقتارىنان تۇسكەن وتىنىشتەردى مۇقيات زەرتتەدى. جىلۋ مەن سۋ تاريفىنە قاتىستى ينۆەستيتسيالىق باعدارلامالار ۋاكىلەتتى ورگانمەن بەكىتىلدى. بۇل 2023 -جىلدىڭ سوڭىنا دەيىن جابدىقتار مەن قۇبىرلارعا جوسپارلانعان جوندەۋ جۇمىستارى تۇگەلدەي اياقتالادى دەگەن ءسوز»، - دەيدى دەپارتامەنت باسشىسى ارمان مالىك.
تاريف قىمباتتاعاننان كەيىن اتالعان كاسىپورىندار قىزمەتكەرلەرىنىڭ جالاقىسى رەسپۋبليكا بويىنشا ورتاشا دەڭگەيگە دەيىن كوتەرىلەدى. بۇل كادر تۇراقسىزدىعى ماسەلەسىن شەشۋگە ىقپال ەتپەك.
