قۇلسارى قالاسىندا جاس كاسىپكەر كىر سابىن ءوندىرىسىن قولعا الدى

اتىراۋ. قازاقپارات - اتىراۋ وبلىسىنىڭ قۇلسارى قالاسىندا كىر سابىن شىعارىلا باستادى، دەپ حابارلايدى قازاقپارات ءتىلشىسى.

جىلىوي اۋدانى اكىمدىگى باسپا ءسوز قىزمەتىنىڭ اقپاراتىنا سۇيەنسەك، جەرگىلىكتى كاسىپكەر بەكارىس جۇقاتايەۆ كىر سابىن شىعارۋ ءىسىن قولعا العان.

جاس جىگىتتىڭ بۇل كاسىپتى باستاعانىنا كوپ ۋاقىت وتپەگەن. ءبىراق، قازىردىڭ وزىندە ونىڭ ءونىمىن ساتىپ الاتىن تۇتىنۋشىلار قاتارى كوبەيگەن.

«سوڭعى 4-5 جىلدان بەرى كىر سابىن شىعارۋدى ويلاستىرعان ەدىم. ويتكەنى، كىر سابىن كۇندەلىكتى تۇرمىستا ءجيى قولدانىلادى. سول سەبەپتەن، ونى شىعارۋ ءادىسىن مەڭگەرۋ ءۇشىن ىزدەندىم. اقتاۋ قالاسىنان ارنايى اپپاراتتى الىپ كەلدىم. كىر سابىن جاساۋعا توڭ ماي مەن كۇنباعىس مايىن شيكىزات رەتىندە پايدالانامىن. ونى باستاپقىدا الماتى وبلىسىنان تاپسىرىسپەن الدىردىم. ەندى مۇنداي شيكىزات وسى وڭىردەن تابىلىپ وتىر. قازىر سۇرانىستىڭ ارتۋىنا بايلانىستى كۇنىنە 2 مىڭ سابىن شىعارامىن. سابىنعا «Jylyoi Soap» اتاۋىن بەرۋدى ءجون كوردىم»، - دەيدى بەكارىس جۇقاتايەۆ.

جاس كاسىپكەر ەندىگىدە سۇيىق سابىن جانە ءيىس سابىن شىعارۋدى جوسپارلاپ وتىر. بۇل ءۇشىن مەملەكەتتىك گرانتتارعا قاتىسۋعا نيەت ءبىلدىرىپ وتىر.

«ءبىر كىر سابىننىڭ باعاسى 100 تەڭگەدەن باستالادى. ەڭ قىمباتى - 250 تەڭگە. بۇل باعا سابىننىڭ سالماعىنا، سىرتىنداعى ارنايى قاپتاماسىنا بايلانىستى قويىلعان»، - دەيدى بەكارىس جۇقاتايەۆ.

ەسكە سالا كەتەلىك، بۇدان بۇرىن اتىراۋ وبلىسىندا اۋىل كاسىپكەرى بۇقتىرىلعان تۇيە ەتىن قالبىرعا سالىپ شىعاراتىنىن جازعان ەدىك. يساتاي اۋدانىنىڭ جانباي اۋىلىندا تۇراتىن اينۇر سيسەكەنوۆا قالبىردى الماتى قالاسىنان الدىرادى. ءونىم ساپالى بولۋى ءۇشىن قالبىرلار زالالسىزداندىرىلادى. ارنايى قۇرىلعىمەن تۋرالعان تۇيە ەتىن تۇزداپ قويادى. سودان كەيىن عانا قالبىرعا سالادى.