ۇلىتاۋ وبلىسىندا سيىر باسى نەلىكتەن ازايعانى بەلگىلى بولدى

استانا. قازاقپارات - ۇلىتاۋ وبلىسىنىڭ اكىمى بەرىك ءابدىعالي ۇلى ورتالىق كوممۋنيكاتسيالار قىزمەتىنىڭ كوشپەلى بريفينگىسىندە وڭىردە سيىر باسى نەلىكتەن ازايىپ، جىلقى سانى وسكەنىن ءتۇسىندىردى، دەپ حابارلايدى قازاقپارات ءتىلشىسى.

«قازىر وڭىردە اۋىل شارۋاشىلىعىن دامىتۋ جۇمىستارى ءجۇرىپ جاتىر. بۇل سالاداعى نەگىزگى باعىت - ەت ءوندىرۋ. مىسالى، وكىنىشكە قاراي، ءىرى قارا سانى 4,8 پايىز نەمەسە 222 مىڭنان 211 مىڭ باسقا ازايىپ جاتىر. ءبىراق جىلقىنىڭ سانى كوبەيىپ كەلەدى. بۇرىن 197 مىڭ بولسا، 220 مىڭعا ارتتى. حالىقتىڭ كوبى قوي مەن سيىر باعاتىن جۇمىس كۇشى جوق بولعاندىقتان جىلقىعا كوشىپ جاتىر. سوندىقتان قازىر نەسيەلەردى ءىرى قارا مەن قوي باسىن كوبەيتۋگە، ەت وڭدەۋگە باعىتتاپ وتىرمىز» ، - دەدى اكىم.

ونىڭ سوزىنە قاراعاندا، وڭىردە باعانى تۇراقتاندىرۋ قورى جۇمىس ىستەيدى.

«وعان ۇكىمەتتەن ارنايى 1 ميلليارد تەڭگەگە جۋىق قاراجات ءبولىندى. 994 توننا ونىمگە ينتەرۆەنتسيا جۇرگىزىلدى. وتكەندە ساۋدا جانە ينتەگراتسيا مينيسترلىگىنىڭ ماماندارى كەلىپ الەۋمەتتىك كاسىپكەرلىك كورپوراتسيانىڭ جۇمىسىنداعى ءبىراز قاتەلىكتى كورسەتىپ كەتتى. ول ءبىر جاعىنان تاجىريبەنىڭ ازدىعىنا بايلانىستى. انىقتالعان كەمشىلىكتەردى تۇزەۋ جۇمىستارى ءجۇرىپ جاتىر»، - دەدى بەرىك ءابدىعالي ۇلى.