ۇلىتاۋ وبلىسىندا ءتورتىنشى مۇناي وڭدەۋ زاۋىتى سالىنۋى مۇمكىن

استانا. قازاقپارات - ۇلىتاۋ وبلىسىنىڭ اكىمى بەرىك ءابدىعالي ۇلى ۇلىتاۋ وبلىسىندا ءتورتىنشى مۇناي وڭدەيتىن زاۋىت سالىنۋى مۇمكىن ەكەنىن ءمالىم ەتتى، دەپ حابارلايدى قازاقپارات ءتىلشىسى.

«ءبىزدىڭ بيۋدجەتتىڭ كىرىسىنىڭ 70 پايىزى «قازاقمىس» كورپوراتسياسىنا تيەسىلى. ءوندىرىس كولەمىنىڭ 75 پايىزىن وسى كاسىپورىن الىپ وتىر. ياعني بىزدەگى ەكونوميكانىڭ نەگىزى وسى كورپوراتسياعا تاۋەلدى. ءتىپتى مونووبلىس دەپ تە اتاۋعا بولادى. وسىعان بايلانىستى ءوڭىردى دامىتۋدىڭ كەشەندى جوسپارىندا ايماق ەكونوميكاسىن ءارتاراپاتاندىرۋدى نەگىزگى باعىت ەتىپ الدىق. 2026 -جىلعا دەيىن جالپى سوماسى شامامەن 140 ميلليارد تەڭگە بولاتىن 14 ينۆەستيتسيالىق جوبا پۋلىن جاسادىق.

قازىر قىتايدىڭ City Construction كومپانياسىمەن مۇناي وڭدەۋ زاۋىتىن سالۋ تۋرالى كەلىسىم جۇرگىزىپ جاتىرمىز. ءبىراق، وكىنىشكە قاراي، ەنەرگەتيكا مينيسترلىگى بىزگە وڭدەيتىن مۇنايدىڭ جەتىسپەيتىنى تۋرالى حابار بەردى. ينۆەستور مەن ەنەرگەتيكا مينيسترلىگىنىڭ اراسىندا ءقازىر كەلىسسوز ءجۇرىپ جاتىر»، - دەدى بەرىك ءابدىعالي ۇلى.

سونداي- اق ول ءوڭىردىڭ بيۋدجەتى دە باسقا وڭىرلەرمەن سالىستىرعاندا ەڭ تومەن بولىپ ەسەپتەلەتىنىن ەسكە سالدى.

«ۇلىتاۋ وبلىسىنىڭ بيۋدجەتى نەبارى 128 ميلليارد تەڭگە عانا. مىسالى، بۇل قاراعاندى وبلىسىمەن سالىستىرعاندا 4 ەسە از. وسىعان بايلانىستى، وڭىردە قوردالانعان پروبلەمالارعا بايلانىستى ءبىز بىلتىر ءوڭىردى دامىتۋدىڭ 2026 -جىلعا دەيىنگى جوسپارىن قابىلدادىق. جوسپار اياسىندا 1,4 تريلليون تەڭگە كولەمىندە ءارتۇرلى كوزدەن ينۆەستيتسيالار تارتۋ كوزدەلگەن. بۇگىنگى تاڭدا كەشەندى جوسپار اياسىندا 85 ميلليارد تەڭگەدەن استام قاراجات سالىندى. جالپى قۇنى 5 ميلليارد تەڭگە بولاتىن 6 جوبا ىسكە قوسىلىپ، 430 جاڭا جۇمىس ورنى قۇرىلدى»، - دەدى اكىم.