ينتەرنەت ارقىلى تاماق الدىرعاندا نەنى ەسكەرۋ كەرەك
- تاپسىرىس بەرمەس بۇرىن سايتتان مىنا اقپاراتتى تابىڭىز: فيرمالىق اتاۋى، ورنالاسقان جەرى (تاماق دايىندالاتىن ستاتسيونارلىق وبەكتىنىڭ مەكەنجايى) جانە جۇمىس رەجيمى. ۇسىنىلاتىن تاماق ونىمدەرى تۋرالى اقپارات ماڭىزدى، ول دا سايتتا جاريالانۋى ءتيىس.
- چەكتى (ساتۋشىنىڭ مەكەنجايىمەن) ەلەكتروندى پوشتاعا نەمەسە تەلەفونعا العانىڭىزدى ناقتىلاۋ ءۇشىن تولەمدى جەكە تۇلعالارعا اۋدارماڭىز.
- تاعامنىڭ اتاۋى، جارامدىلىق مەرزىمى جانە قاپتاماداعى قۇرامى كورسەتىلگەن بە، جوق پا - سوعان نازار اۋدارىڭىز. سونداي- اق ءونىمنىڭ سالماعى (كولەمى) مەن ونىڭ تاعامدىق قۇندىلىعىنا ءمان بەرگەن ءجون. ونىمدە دايىندالعان كۇنى مەن ساعاتى، جارامدىلىق مەرزىمى جانە ساقتاۋ شارتتارى، تاماق ونىمدەرىن دايىنداۋشىنىڭ اتاۋى جانە ورنالاسقان جەرى نەمەسە تاماق ونىمدەرىن دايىنداۋشى جەكە كاسىپكەردىڭ تەگى، اتى، اكەسىنىڭ اتى جانە ورنالاسقان جەرى، تاپسىرىس بەرۋشىگە دايىنداۋ بويىنشا ۇسىنىمدار (قاجەت بولعان جاعدايدا) كورسەتىلۋى ءتيىس.
- ينتەرنەت ارقىلى الدىرعان تاماقتى تۇتىنار الدىندا قاپتامانىڭ اشىلماعانىنا كوز جەتكىزىپ، كوزگە كورىنىپ تۇرعان ءبۇلىنۋ بار- جوعىن تەكسەرىڭىز. تاماقتانار الدىندا قولىڭىزدى جۋىڭىز.
- ازىق- تۇلىك ونىمدەرىن جارامدىلىق مەرزىمىن ەسكەرە وتىرىپ ساقتاڭىز، مەرزىمى وتكەن زاتتاردى تاستاڭىز.
- كۇماندى سايتتار ارقىلى كەزدەيسوق ادامداردان ۇيدە دايىندالعان ونىمدەردى، تورت ساتىپ الماڭىز.
«ازىق- تۇلىكتى دۇرىس دايىنداماۋ نەمەسە تاماقتى دۇرىس ساقتاماۋ ارقىلى بەرىلەتىن 200-دەن استام اۋرۋ بار. كەز كەلگەن تاماقتان ۋلانۋدىڭ تىكەلەي سەبەپتەرى - سانيتارلىق نورمالاردى ساقتاماۋ نەمەسە قۇرامىندا پاتوگەندەر مەن ۋلى زات بار تاعامداردى جەۋ. بۇل اۋرۋلار جاپپاي جۇعىپ، سونداي-اق جەكە جاعدايلاردا دا پايدا بولۋى مۇمكىن. تاماقتان ۋلانۋ كەنەتتەن باستالادى، ادامنىڭ جاعدايى تەز ناشارلايدى. ۋلانۋ كوبىنە قۇرامىندا زياندى زات بار تاعامدى تۇتىنعاندا بولادى. ۋلانۋ بەلگىلەرى بولعان كەزدە الدىمەن اسقازاندى شايۋ كەرەك. دەرەۋ دارىگەر كومەگىنە جۇگىنىپ، ەشقانداي جاعدايدا ءوزىڭدى-ءوزىڭ ەمدەمەگەن ءجون. ويتكەنى بۇل ءسىزدىڭ ومىرىڭىزگە قاۋىپ ءتوندىرۋى مۇمكىن» دەپ ەسكەرتەدى سانيتار دارىگەرلەر.
