جۇكتى ايەلدەردەگى انەميا مەرزىمىنەن بۇرىن بوسانۋعا اكەلۋى مۇمكىن

الماتى. قازاقپارات- جۇكتى ايەلدەردە قانداي اۋرۋلار ءجيى كەزدەسەتىنى جانە ولار بالاعا قانشالىقتى ءقاۋىپتى ەكەنىن الماتىلىق دارىگەر ايتىپ بەردى، دەپ حابارلايدى قازاقپارات ءتىلشىسى.

الماتىداعى №2-قالالىق پەريناتالدىق ورتالىقتىڭ اكۋشەر- گينەكولوگى قىمبات ابدرايموۆانىڭ ايتۋىنشا، جۇكتى ايەلدەردە گەستاتسيالىق قانت ديابەتى بولۋى مۇمكىن - بۇل ايەلدىڭ جۇكتىلىك كەزىندە قانداعى قانت دەڭگەيىنىڭ جوعارىلاۋى. بۇل انا اعزاسى قانداعى قانت دەڭگەيىن باقىلاۋ ءۇشىن جەتكىلىكتى ينسۋلين شىعارا المايتىنىنا بايلانىستى. ەگەر گەستاتسيالىق قانت ديابەتى ەمدەلمەسە، بۇل بالاعا كەرى اسەر ەتەدى.

«جۇكتى ايەلدەردە قانداعى گەموگلوبين دەڭگەيى قالىپتى دەڭگەيدەن تومەندەگەن كەزدە انەميا ءجيى كەزدەسەدى. بۇل اعزانىڭ ەريتروتسيتتەردى جەتكىلىكسىز وندىرۋىنە بايلانىستى. جۇكتى ايەلدەردە انەميا نارەستەنىڭ سالماعىنىڭ تومەندىگى جانە مەرزىمىنەن بۇرىن بوسانۋ سياقتى پروبلەمالارىنا اكەلۋى مۇمكىن. سونداي-اق، ايەلدىڭ جۇكتىلىك كەزىندە قان قىسىمى كوتەرىلىپ، زارىندە اقۋىز پايدا بولعان كەزدە پرەەكلامپسيا قاۋپى بار. بۇل جاعداي انا مەن بالا ءۇشىن قاۋىپتى بولۋى مۇمكىن، سەبەبى ول مەرزىمىنەن بۇرىن بوسانۋعا، پلاتسەنتا پروبلەمالارىنا جانە باسقا اسقىنۋلارعا اكەلەدى»، - دەيدى دارىگەر.

سونىمەن قاتار، ول ينفەكسيالاردىڭ دا قاۋىپتى ەكەنىن ايتتى.

«تۇماۋ جانە سيتومەگالوۆيرۋس سياقتى ۆيرۋستىق ينفەكسيالار ءتۇرلى اسقىنۋلارعا اكەلۋى مۇمكىن. سوندىقتان جۇكتىلىك كەزىندە تۇراقتى مەديتسينالىق كومەك الۋ جانە دەنساۋلىقتى باقىلاۋ ماڭىزدى»، - دەيدى قىمبات ابدرايموۆا.