قازاقستاننىڭ وزبەكستانداعى مادەنيەت كۇندەرى «اباي» وپەراسىمەن اياقتالدى

تاشكەنت. قازاقپارات - وزبەكستانداعى قازاقستاننىڭ مادەنيەت كۇندەرى تاشكەنتتىڭ باس تەاترىندا «اباي» وپەراسىنىڭ كورسەتىلىمىمەن سالتاناتتى تۇردە اياقتالدى.

بۇل تۋرالى قازاقپارات ق ر مادەنيەت جانە سپورت ءمينيسترى اسحات ورالوۆتىڭ تەلەگرام كانالىنا سىلتەمەمەن حابارلايدى.

«الىشەر ناۋاي اتىنداعى ۇلكەن تەاتر ساحناسىندا اتاقتى قويىلىممەن اباي اتىنداعى قازاق ۇلتتىق وپەرا جانە بالەت تەاترى ونەر كورسەتتى. مەن بۇل مادەني ءىس- شارانى اشۋ قۇرمەتىنە يە بولدىم. كورەرمەندى قۇتتىقتاپ، قازاقستاننىڭ مادەنيەت كۇندەرىن ۇيىمداستىرۋعا كومەكتەسكەنى ءۇشىن باۋىرلاس ەلگە العىسىمدى ءبىلدىردىم.

«اباي» وپەراسى كەزدەيسوق تاڭدالمادى. اباي قۇنانباي ۇلى - قازاق حالقىنىڭ عانا ەمەس، بۇكىل الەم ءۇشىن داڭقتى تۇلعا. اباي ءارقاشان ادامزات بالاسىن سۇيۋگە شاقىرعان. وسى قاعيدالارعا سۇيەنە وتىرىپ، ءبىز وزبەك ارىپتەستەرىمىزبەن قارىم- قاتىناستى نىعايتۋ باعىتىندا جۇمىس ىستەيمىز دەپ كەلىستىك. ودان بولەك، بيىل احمەت جۇبانوۆ پەن لاتيف حاميدي دايىنداعان شىعارماعا 80 جىل تولادى.

كورەرمەندەر قويىلىمعا ريزا بولدى، قوشەمەت ۇزاق ۋاقىت بويى باسىلمادى. قويىلىم اياقتالعاننان كەيىن دە ساحناعا شىعىپ اكتەرلەرىمىزگە تاماشا ونەر كورسەتكەنى ءۇشىن العىس ايتتىم»، - دەپ جازادى مينيستر.

ايتۋىنشا، وزبەكستانداعى قازاقستاننىڭ مادەنيەت كۇندەرىنىڭ ءتورت كۇندىك باعدارلاماسى وتە قارقىندى بولعان. ماسەلەن، 20-ماۋسىمدا تاشكەنتتەگى «تۋركيستون» ونەر سارايىندا روزا باعلانوۆا اتىنداعى «قازاقكونسەرت» م ك ۇ ارتيستەرىنىڭ گالا-كونسەرتى ءوتتى. ارتيستەرىمىز 22-ماۋسىمدا سامارقان وبلىستىق مۋزىكالىق- دراما تەاترىندا، 23-ماۋسىمدا بۇحاراداعى جاستار ورتالىعىنىڭ كونسەرت زالىندا ونەر كورسەتتى.

«ال، تاشكەنتتەگى الىشەر ناۋاي اتىنداعى كينوتەاتردا 20-23-ماۋسىم ارالىعىندا قازاقستاننىڭ كينو كۇندەرى ءوتتى. باعدارلاماعا «مۇقاعالي» (رەجيسسەر بولات قالىمبەتوۆ)، «دوس- مۇقاسان» (رەجيسسەر ايدىن ساحامان)، «پاراليمپياداشى» (رەجيسسەر الديار بايراقىموۆ)، «ستارتتا» (رەجيسسەر ەرنار نۇرعاليەۆ)، «1941 -جىلدىڭ جازى» (رەجيسسەر بەكبولات شەكەروۆ) كارتينالارى، قالپىنا كەلتىرىلگەن «سۇلتان بەيبارىس» (رەجيسسەر بولات مانسۇروۆ) لەنتاسى ەندى جانە «كەنجە قىز»، «بەسىك جىرى»، «امەن اعا اعاشى» انيماتسيالىق فيلمدەرى كورسەتىلدى.

قازاقستاندىق ارتيستەردىڭ قاتىسۋىمەن وتەتىن مادەني ءىس- شارالار مۇنىمەن اياقتالمايدى. مىسالى، بيىل وزبەكستان رەسپۋبليكاسىنا م. وسكىنبايەۆ اتىنداعى ماڭعىستاۋ وبلىستىق فيلارمونياسىنىڭ گاسترولدىك ساپارى جوسپارلانعان.

وزبەكستانعا جۇمىس ساپارىم اياسىندا مەن تاشكەنتتىڭ ءبىرقاتار تاريحي-مادەني ەسكەرتكىشىن ارالادىم. بۇل - تولە بي كەسەنەسى جانە الەمدەگى ەڭ كونە قۇران قولجازباسى ساقتالعان حاست- يمام مەشىتى.

سونىمەن قاتار، وزبەك ارىپتەسىم وزودبەك نازاربەكوۆپەن ەكىجاقتى كەزدەسۋ وتكىزدىم. ءبىز ەلدەرىمىزدىڭ مادەنيەت جانە تۋريزم سالاسىنداعى ىنتىماقتاستىعىن ودان ءارى دامىتۋ ماسەلەسىن تالقىلادىق»، - دەيدى اسحات ورالوۆ.

بۇعان دەيىن وزبەكستاندا قازاقستاننىڭ مادەنيەت كۇندەرى ءوتىپ جاتقانىن حابارلاعان ەدىك.