ەكى قولى جوق اقتوبەلىك قۇس شارۋاشىلىعىن دامىتىپ وتىر
«اۋىل اماناتى» جوباسى قولعا الىنعاندا تاپسىرىس ارتىپ، بيىل 30 ميلليون تەڭگە تابىس تاپتى، دەپ حابارلايدى قازاقپارات ءتىلشىسى.
I توپتاعى مۇگەدەكتىگى بار تايبەك وتەگەنوۆ سوڭعى جىلدارى ەڭبەكقورلىعىمەن كوپتى تاڭعالدىرىپ ءجۇر. 40 تان اسقان ازامات اسكەردەن ورالعان سوڭ جوعارى ۆولتتى ەلەكتر توگىنا ءتۇسىپ، ەكى قولىنان ايىرىلعان. العاشىندا ءتورت قابىرعاعا قامالىپ، قامىقتى، قايعىردى. بۇل قيىندىق 10 جىلعا سوزىلدى. كەيىن ءبىر-اق ساتتە باستان كەشكەن وقيعا ونىڭ جىگەرىن جانىپ، ومىرگە قايتا قۇلشىنىس سىيلادى. ءسويتىپ، ون ەكى مۇشەسى ساۋ ادامدارمەن تەڭ وتىرىپ، ءىسىن باستادى. ونىڭ قازىرگى تىرلىگى كوپكە ۇلگى. اقىل-كەڭەس سۇراپ كەلەتىندەر كوپ.
«2018 -جىلى 500 مىڭ تەڭگە قايتارىمسىز گرانت الدىم. بيزنەستى دامىتۋ باعدارلاماسىنا قاتىسىپ، تاعى دا قايتارىمسىز 2 ميلليون تەڭگە قارجى يەلەندىم. سودان بەرى قۇس شارۋاشىلىعىمەن اينالىسىپ كەلەمىن. الدىمەن 40-50 بالاپان شىعاراتىن اپپارات ساتىپ الدىم. ال قازىر 21 كۇندە مىڭ دانا بالاپان شىعارۋعا مۇمكىندىك بەرەتىن اپپارات بار. نەگىزى ءبىز وسى كۇنگە دايىندىقتى بيىل قاڭتاردا باستادىق. وڭىردە «اۋىل اماناتى» جوباسى باستالعانىن بىلەمىز. ال ونداعى ەڭ ءتيىمدى باعىت - قۇس شارۋاشىلىعى. سوندىقتان ايلار بويى بالاپان جيناپ، كوكتەم- جازدا ساتتىق. تابىسىمىز 30 ميلليون تەڭگەدەن استى»، - دەدى تايبەك وتەگەنوۆ.
ونىڭ ايتۋىنشا، ينكۋرابور اپپاراتى قازىر وتە تابىستى بيزنەسكە اينالعان. ەگەر مىڭ دانا بالاپان بولسا، ونىڭ تەڭ جارتىسىن ساتادى. قالعانىن ءوسىرىپ، تاۋىق سۇراعاندارعا ساۋدالايدى. سونىمەن بىرگە بالاپان باعۋعا ارنالعان جاشىك تە جاساپ شىعارا الادى.
«ەلگە ادال قىزمەت ەتۋ - ارمانىم. جالپى، جۇمىس ىستەيمىن دەگەن ادام ەكى قولى بولماسا دا، ىسكە كىرىسەدى. قازىر ءوزىم شولاق قولىممەن كەسە ۇستاپ، شاي ىشەمىن، كولىك تە جۇرگىزەمىن. قۇدىقتان شەلەكپەن ءبىر توننا سۋ تارتا بەرەم. قازىر سايراپ تۇرمىن-اۋ. بۇل ەپتىلىگىم ءۇشىن ءبىراز تەر توكتىم. قولىمنىڭ كەسىلگەنىنە 20 جىل بولدى. مەن 20 جاسىمدا قوس قولىمنان ايىرىلدىم. اۋىلدا جۇرگەن كەزدە ورىستەن قوي كەلدى. اعام اۋىرىپ جاتىپ، جاعدايى بولمادى. جانىمنان ءوتىپ بارا جاتقان جىگىتتەن مالعا سۋ قۇيىپ جىبەرۋىن ءوتىندىم. ءبىراق ول «مەن ءۇشىن مال جينايسىڭ با؟» دەپ قايىرىلماي كەتتى. وسى جىگىتتىڭ ءسوزى جانىما باتتى. قولىمنان ءىس كەلەتىنىن دالەلدەمەك بولىپ، سول جەردە شەلەكتى قۇدىققا سالدىم. ءبىر كەسە ۇستاۋ ءۇشىن ءبىر جىل، سۋ قۇيۋ ءۇشىن 2 جىلىن سارپ ەتكەن اداممىن»، - دەدى تايبەك وتەگەنوۆ.
ونىڭ جانىندا وتباسى بار. اۋىلداعى شارۋاشىلىقتا اعا-جەڭگەسى وتىرسا، ءوزى قالادا بالاپان شىعارادى. ينكۋباتور اپپاراتىنان شىققان بالاپاندى اۋىلعا جىبەرىپ، قاجەتتىسىن قالاعا الدىرىپ، قايتا ساتادى. ۇيلەنگەن. ەكى بالانىڭ اكەسى.
«كەزىندە 12 مۇشەسى ساۋ ادامداردى باسىپ وزسام دەپ ەدىم، وزدىم. ادام ەڭبەك ەتۋى كەرەك»، - دەدى ول.
