ۇلتتىق بانك ينتەرنەت-دۇكەنىندە الاياقتاردىڭ بەلسەندى بولا باستاعانىن ەسكەرتتى
ماسەلەن، الەۋمەتتىك جەلىلەر مەن مەسسەندجەرلەردەگى قازاقستان نۋميزماتتارىنىڭ تاقىرىپتىق توپتارىندا الاياقتار «كومەكشى باعدارلاماعا» ءبىر رەتتىك جول اشۋ مۇمكىندىگىن ارنايى تولەمگە ۇسىنىپ ءجۇر. ءسويتىپ، ول باعدارلاما قۇب ينتەرنەت-دۇكەنىنەن ساتىپ الۋشىلاردىڭ سەبەتىنە كوللەكتسيالىق مونەتالاردى كەز كەلگەن مولشەردە اۆتوماتتى تۇردە قوسادى دەپ سەندىرەدى.
سونىمەن قاتار، كوللەكتسيالىق مونەتالاردى سەبەتكە سالۋداعى «ءساتتى» وپەراتسيالارى بار سۋرەتتەر كورسەتىلەدى جانە «كومەكشى باعدارلاما» تولىعىمەن قاۋىپسىز ەكەنى تۋرالى جالعان اقپارات بەرىلەدى. الايدا، قولما-قول اقشانى العاننان كەيىن، الاياقتار ۆيرۋس نەمەسە باسقا دا زياندى كودتاردان تۇراتىن باعدارلامالىق جاساقتامانى ۇسىنادى. ولاردىڭ ورىندالۋى پايدالانۋشى دەرەكتەرىنىڭ تارالىپ كەتۋىنە نەمەسە جوعالۋىنا اكەلۋى مۇمكىن.
جوعارىدا ايتىلعاندارعا بايلانىستى ۇلتتىق بانك ساق بولۋدى، قۇب ينتەرنەت-دۇكەنىمەن جۇمىس ىستەۋ بارىسىندا كۇماندى باعدارلامالىق جاساقتامانى ساتىپ الماۋدى جانە پايدالانباۋدى سۇرايدى.
ساتىپ الىناتىن مونەتالار سانىنا ءليميتتى ۇلتتىق بانك ءاربىر مامىلە بويىنشا تەكسەرەدى. بۇل قۇب ينتەرنەت-دۇكەنىنىڭ سەبەتىنە مونەتالاردى ءساتتى قوسقان جاعدايدا دا، بەلگىلەنگەن ليميتتەن تىس ساتۋ مۇمكىن ەمەستىگىن بىلدىرەدى.
سونداي-اق، قۇب ينتەرنەت- دۇكەنى پايدالانۋشى كەلىسىمىنىڭ 11.4-تارماعىنا سايكەس، ساتىپ الۋشى باسقا ساتىپ الۋشىلاردان باسەكەلەستىككە جاتپايتىن تەحنيكالىق ارتىقشىلىقتاردى بىلدىرەتىن جانە قۇب ينتەرنەت-دۇكەنىنىڭ ەسەپتەۋ قۇرالدارىنا جوعارى جۇكتەمە جاسايتىن اۆتوماتتاندىرىلعان جۇيەلەر مەن قۇرالداردى (ينتەرنەت-بوتتار مەن باسقا قۇرالدار) پايدالانباۋعا مىندەتتەمە الاتىنىن ەسكە سالامىز. وسى تارماق بۇزىلعان جاعدايدا ۇلتتىق بانك ساتىپ الۋشىنىڭ ەسەپتىك جازباسىن تۇراقتى بۇعاتتاۋ قۇقىعىن وزىنە قالدىرادى.
ءسىز نەمەسە تانىستارىڭىز الاياقتىق ارەكەتتەرگە تاپ بولعان جاعدايدا، قاجەتتى سوت ءىسىن جۇرگىزۋ ءۇشىن قۇقىق قورعاۋ ورگاندارىنا ءتيىستى وتىنىشپەن جۇگىنۋدى ۇسىنامىز.
كەڭەس الۋ ءۇشىن 1477 قىسقا ءنومىرى بويىنشا ۇلتتىق بانكتىڭ بايلانىس ورتالىعىنا حابارلاسۋعا بولادى.
