تيتان باتيسكافىن شىعارۋشى كومپانيا باسشىسىنىڭ ايەلى - «تيتانيكتە» بولعان جۇپتىڭ تىكەلەي ۇرپاعى
راش – 18-ماۋسىمدا ءوز كومپانياسىنا تيەسىلى «تيتان» سۇڭگۋىر كەمەسىمەن «تيتانيك» قالدىقتارىن كورۋگە اتتانعان بەس جولاۋشىنىڭ ءبىرى. ونىڭ ايەلى ۆەندي راش - يسادور مەن يدا شتراۋستىڭ شوبەرەسى، ولار 1912 -جىلى اتلانت مۇحيتى ارقىلى ساياحاتتاۋ كەزىندە ايسبەرگكە سوعىلىپ، سۋعا باتىپ كەتكەن الىپ كەمە «تيتانيكتەگى» 1500 دەن استام ادامنىڭ اراسىندا بولعان. «تيتانيك» سۋعا باتىپ بارا جاتقاندا ەرلى- زايىپتى شتراۋستار كەمەدە قالۋعا شەشىم قابىلدايى.
«ەكيپاج ايەلدەر مەن بالالاردى قۇتقارماق بولعان كەزدە يدا شتراۋس قۇتقارۋ قايىعىنا وتىرۋدان باس تارتقان»، - دەيدى ولاردىڭ شوبەرەسى پول كۋرتسمان Fox News-كە بەرگەن سۇحباتىندا.
دجەيمس كەمەروننىڭ 1997 -جىلعى «تيتانيك» بلوكباستەرىندە ولاردىڭ ماحاببات تاريحى (توسەكتە قولۇستاسىپ جاتقان قارت ەرلى- زايىپتى) كورىنىس تابادى.
ۆەندي مەن ستوكتون راش 1986 -جىلى ۇيلەنگەن. LinkedIn پلاتفورماسىنداعى پاراقشاسىندا كورسەتىلگەن اقپاراتقا قاراعاندا ۆەندي OceanGate كومپانياسىندا بايلانىس ديرەكتورى بولىپ جۇمىس ىستەيدى. ول بۇعان دەيىن OceanGate قورىنىڭ پرەزيدەنتى قىزمەتىن اتقارعان.
61 جاستاعى ستوكتون راش وزگە 4 اداممەن بىرگە مىنگەن «تيتان» باتيسكافىنىڭ ەكيپاجى جەكسەنبى كۇنى اتلانت مۇحيتىنىڭ تۇبىنە سەگىز ساعاتتىق سۇڭگۋگە اتتانعان بولاتىن.
شامامەن 1 ساعات 45 مينۋتتىق ساپاردان كەيىن سۇڭگۋىر قايىق كانادالىق «پوليارنىي پرينتس» زەرتتەۋ كەمەسىمەن بايلانىسىن ءۇزدى. اۋقىمدى ىزدەستىرۋ- قۇتقارۋ وپەراتسياسى نيۋفاۋندلەند (كانادا) جاعالاۋىندا جەرگىلىكتى ۋاقىت بويىنشا 17:40 شاماسىندا، «تيتان» سۋ بەتىنە شىعۋى ءتيىس بولعاننان كەيىن شامامەن ءۇش ساعات وتكەن سوڭ باستالدى.
كۇنى كەشە ا ق ش جاعالاۋ كۇزەتى سولتۇستىك اتلانت مۇحيتىندا جوعالىپ كەتكەن «تيتان» سۇڭگۋىر قايىعىن ىزدەستىرۋ ايماعىنان الدەبىر ءجۇزۋ قۇرالىنىڭ جارىقشاقتارى مەن سىنىقتارى تابىلعانىن حابارلادى. بورتتا بولعان بەس ادام دا قازا تاپقان.
