نەلىكتەن كەي بالالار تۋا سالا قاتەرلى ىسىككە شالدىعادى؟
دۇرىس ەمەس تاماقتانۋ، الكوگول ءىشۋ، تەمەكى تارتۋ جانە قوزعالماۋ ادام دەنساۋلىعىنا جاعىمسىز اسەر ەتەدى. الايدا زياندى ادەتتەر جاساپ ۇلگەرمەگەن كىشكەنتاي بالالاردا دا قاتەرلى ىسىك پايدا بولىپ جاتادى. بالالارداعى قاتەرلى ىسىك جايلى نە ءبىلۋ كەرەك؟ Doctorpiter پورتالىنا بالالار ونكولوگى اننا ەلفيموۆا جاۋاپ بەردى.
سەبەپسىز بۇزىلعان گەندەر
ماماننىڭ ايتۋىنشا، كەي بالالار تۋا سالا قاتەرلى ىسىككە شالدىعادى.
«ءبىزدىڭ اعزامىزدا ۇنەمى ءوسىم مەن جاسۋشالار ءبولىنۋى بولادى. بۇل پروتسەستەر كۇردەلى بيولوگيالىق مەحانيزمدەرمەن رەتتەلەدى. بەلگىلى ءبىر ساتتە قالىپتاسقان جۇيە ىستەن شىعىپ، باقىلاۋسىز وسەتىن جانە بولىنەتىن جاسۋشالار پايدا بولادى. بۇل پروتسەسس مۋتاتسيالارمەن ىسكە اسادى. مۋتاتسيالار سىرتقى ورتا فاكتورلارىنىڭ اسەرىنەن جانە سەبەپسىز پايدا بولۋى مۇمكىن»، - دەيدى ول.
ءجيى مۇنداي انومالدى جاسۋشالاردى يممۋنيتەت انىقتاپ، ول جويىلادى. الايدا قاتەرلى جاسۋشالار ودان «قاشا الاتىن» جانە ءتىرى قالىپ ءارى قاراي دامۋعا مۇمكىندىك بەرەتىن باسقا دا قابىلەتتەرگە يە.
بالالاردا قاتەرلى جاسۋشالاردىڭ تۇزىلۋىنە تۇقىمقۋالاۋشىلىق بەيىمدىلىك تە اسەر ەتەدى. بالالارداعى شامامەن %10 ونكولوگيالىق اۋرۋلار تۋا بىتكەن سيندروممەن جانە اۋرۋمەن بايلانىستى.
بالالاردا قانداي قاتەرلى ىسىكتەر بولادى؟
بالالارداعى ونكولوگيالىق اۋرۋلار ەرەسەكتەردەگىدەن بولەك. بالالار قان جۇيەسى قاتەرلى اۋرۋلارىمەن ءجيى اۋىرادى: اققاندىلىق (لەيكوز) جانە ليمفوما (ليمفالىق جۇيەنى زاقىمدايدى). ەكىنشى ورىندا - مي مەن جۇلىن قاتەرلى ىسىگى. سونداي-اق، بالالاردا نەفروبلاستوما (بۇيرەك قاتەرلى ىسىگى)، نەيروبلاستوما (سيمپاتيكالىق جۇيكە جۇيەسىنىڭ جاسۋشالارىنان پايدا بولادى) جانە سۇيەكتەر قاتەرلى ىسىگى ءجيى كەزدەسەدى.
قاۋىپ-قاتەردى ازايتۋعا بولا ما؟
قاۋىپ-قاتەردى ازايتۋ ءۇشىن اتا-انا نە ىستەي الادى؟ دارىگەردىڭ ايتۋىنشا، وكىنىشكە قاراي، مۇمكىندىكتەر وتە از. سەبەبى بالالارداعى ونكولوگيالىق اۋرۋلارعا سىرتقى فاكتورلار اسەر ەتە قويمايدى.
ەگەر بالادا نەمەسە وتباسىدا تۇقىمقۋالايتىن اۋرۋ جانە سيندروم انىقتالسا جانە ول قاتەرلى ىسىك دامۋىنا اكەلۋى مۇمكىن بولسا، گەنەتيكالىق كونسۋلتاتسيا الۋ كەرەك.
كەي جۇقپالار بالالاردا جانە ەرەسەكتەردە قاتەرلى ىسىك دامۋ قاۋپىن ارتتىرادى، سوندىقتان ۆاكسينا الۋ ماڭىزدى.
جۇكىتىلىك كەزىندە تەمەكى تارتۋ، الكوگول ءىشۋ جانە پسيحيكالىق بەلسەندى زاتتار قولدانۋ مەن بالادا ونكولوگيالىق اۋرۋ دامۋىنىڭ، سونداي-اق بالانىڭ تۋا بىتكەن اۋرۋمەن دۇنيەگە كەلۋىنىڭ اراسىندا بايلانىس بار ەكەنىن دالەلدەگەن زەرتتەۋلەر بار. سوندىقتان جۇكتىلىك كەزىندە جانە بالا ەمىزگەندە بۇل ادەتتەردەن الشاق بولعان ءجون.
ادەتتە، ەرتە جاستا بالاداعى ونكولوگيالىق اۋرۋدى سكرينينگ كومەگىمەن انىقتاۋ مۇمكىن ەمەس. وكىنىشكە قاراي، قان اناليزى دە، كومپيۋتەرلىك توموگرافيا دا ەرتە دياگنوز قويۋعا كومەكتەسپەيدى.
بالالارداعى ونكولوگيالىق اۋرۋدىڭ بەلگىلەرىن باسقا اۋرۋلار بەلگىلەرىمەن شاتاستىرىپ الۋ وڭاي. ولاردىڭ وزىنە ءتان ەرەكشە بەلگىلەرى جوق. الايدا مىنا بەلگىلەر بايقالسا، مىندەتتى تۇردە بالانى دارىگەرگە كورسەتۋ كەرەك:
جوعارى تەمپەراتۋرانىڭ سەبەپسىز ءارى ۇزاق ۋاقىت بولۋى؛
دەنەدە كوپ كوگەرگەن جەرلەر مەن بورتپەلەردىڭ پايدا بولۋى؛
دەنە ماسساسىنىڭ جوعالۋى، سەبەپسىز دەنە ماسساسىنىڭ توقتاپ قالۋى؛
بۇرىن بەلسەندى بولعان بالاداعى السىزدىك، سۇيەكتەرىنىڭ جانە بۋىندارىنىڭ اۋىرۋى؛
باس اۋرۋى.
بۇل بەلگىلەر بالادا مىندەتتى تۇردە ونكولوگيالىق اۋرۋلار بار ەكەنىن بىلدىرمەيدى، ءبىراق بۇل دارىگەر باقىلاۋىن قاجەت ەتەدى.
