دۇنيەجۇزى قازاقتارى قاۋىمداستىعىنىڭ بولاشاعى قانداي؟
اراداعى 30 جىلدا ۇلى جيىن بەس مارتە شاقىرىلىپ، ءار قۇرىلتايدا ءبىرتۇتاس قازاق ۇلتىنىڭ بولاشاعىنا وي تاستاپ، الداعى ماقساتتارىمىزدى ايقىنداعان ەدىك. وسى مەرزىم ىشىندە ەل ەكونوميكاسى ءارتۇرلى كەزەڭدەردى باستان وتكىزسە دە، ۇلى جيىندا تۋ ەتىپ كوتەرگەن مەملەكەتتىك قۋاتىمىز، ۇلتتىق بىرلىگىمىز ارتىپ، قۇرىلتاي العا قويعان ماقسات- مىندەتتەردى ويداعىداي ورىنداپ كەلدى.
ارى قاراي دا الەم قازاقتارىنىڭ الدى اشىق، بولاشاعى جارقىن بولاتىنىنا نىق سەنىمدىمىز. بۇعان تۇركىستاندا وتكەن ۇلتتىق قۇرىلتايدا مەملەكەت باسشىسى قاسىم-جومارت توقايەۆتىڭ «شەتەلدەگى قانداستارىمىزبەن تىعىز قارىم-قاتىناس ورناتىپ، رۋحاني بايلانىستى نىعايتا بەرەمىز! بۇل ماسەلە مەنىڭ جەكە نازارىمدا!» دەپ قاداپ وتىرىپ ايتقان ءسوزى الەم قازاقتارىنا قازاق ەلىنىڭ كورسەتكەن قۇرمەتى، بولاشاقتارى جارقىن بولاتىنىنىڭ كۋاسى.
پرەزيدەنتىمىزدىڭ ءبىراۋىز جىلى ءسوزىن ىستىق ىقىلاسپەن قابىلداپ، راحمەتىن ايتىپ جاتقان الىس-جاقىنداعى قانداستارعا العىسىمدى بىلدىرەمىن. سونىمەن قوسا شەت مەملەكەتتەردە ءومىر ءسۇرىپ جاتقان 5-7 ميلليون قازاق دياسپوراسىن قۇرايتىن قانداستارىمىزدىڭ جانە وتانىنا ورالعان 1 ميلليون 200 مىڭداي اعايىننىڭ باسىن قوسىپ، كۇللى قازاق باۋىرلارىنىڭ ىنتىماق-بەرەكەسىن ارتتىرۋعا ايىرىقشا ۇلەس قوسىپ كەلگەن دۇنيەجۇزى قازاقتارىنىڭ كەزەكتى التىنشى قۇرىلتايىن تاياۋ مەزەتتەردە پرەزيدەنتىمىزدى قاتىستىرا وتىرىپ، استانا قالاسىندا وتكىزسەك دەگەن نيەت بار.
سونىمەن قوسا «بار قازاق - ءبىر قازاق بولايىق» دەگەن بابالار اماناتىن، ەلىمىزدى ماڭگىلىك، تۋىمىزدى بيىك ەتىپ، تاۋەلسىزدىگىمىزدى بىرىگىپ قورعاپ، ساقتايىق دەگەن الەم قازاقتارىنىڭ اسىل ارمان-تىلەگىن ارقالاعان دۇنيەجۇزى قازاقتارىنىڭ قاۋىمداستىعى تىزگىنىن پرەزيدەنتىمىز ءوزى الىپ، وسى ءبىر قۇت قونىپ، قىدىر دارىعان، قاسيەتتى ۇيىمعا باسشىلىق ەتۋدى ۇسىنعان الەم قازاقتارىنىڭ تىلەگى قابىل بولاتىنىنا سەنىمدىمىز.
د ق ق-عى مەملەكەت باسشىسىنىڭ «جاڭا قازاقستان، ادىلەتتى مەملەكەت» قۇرۋ ساياساتىن جۇزەگە اسىرۋ جولىندا قانداستارىمىزدى ايرانداي ۇيىتىپ، قازاق ەلىنىڭ الەمدىك بەدەلىن كوتەرۋگە، العا قارىشتاپ دامۋىنا ۇلەسىن قوساتىن مەملەكەتتىك، ۇلتتىق ماڭىزى زور، حالىقارالىق بەدەلى جوعارى ۇيىم رەتىندە سانالا بەرەتىن بولادى.
الەم قازاقتارىنىڭ الدىندا شەشىمىن تاپپاعان كەيبىر تۇيتكىلدى ماسەلەلەردى مەملەكەتىمىز تولىعىنان شەشىپ، وتانىنا ورالام دەۋشىلەرگە ەشبىر بوگەت بولمايتىنى ايان. وسى تۇرعىدا ەڭبەك جانە الەۋمەتتىك قامسىزداندىرۋ مينيستىرلىگى ارقىلى باعىت باعدارلامالار جاسالىپ، «اتا- جول كارتاسى» شەت قازاقتارىنىڭ ىقىلاسىن اۋدارا باستادى.
كوشىپ كەلۋشىلەرگە بارلىق مۇمكىندىكتەردى جاساۋ تۇرعىسىندا ولاردى سارساڭعا سالماي ءتيىستى قاعازداردى ءبىر تەرەزە ارقىلى وتكىزىپ، جاۋابى دەرەۋ قارالاتىن مۇمكىندىكتەر قاراستىرىلعان. شەت ەلدەردەگى جانە وبىلىستارداعى د ق ق-نىڭ فيليالدارىنىڭ اتقاراتىن مىندەتتەرى قايتا پىسىقتالىپ، وڭدى شەشىمدەر تابۋدا. د ق ق-نىڭ تۋىن بيىك كوتەرىپ، الەم قازاقتارىنىڭ جانە پرەزيدەنتىمىزدىڭ، ۇكىمەتتىڭ سەنىمىن اقتاۋ - د ق ق-نىڭ ابىرويلى مىندەتى. «بار قازاق - ءبىر قازاق» قاعيداسىن بەرىك ۇستانىپ، ەلىمىزدىڭ وركەنىنە ەلەۋلى ۇلەس قوسا بەرەتىن بولامىز.
قۇرمەتتى قانداستار!
ءبىز «ءىس-قىزمەتىمىزدى العا جۇرگىزۋ ماقساتىندا دۇنيەجۇزى قازاقتارى قۇرىلتايىندا قۇرىلعان قوردان قول ءۇزىپ قالدىق، قارجى جوق» دەپ قاۋىمداستىق جۇمىسىنا بەيجاي قاراي المايمىز. سوندىقتان دۇنيەجۇزى قازاقتارى قاۋىمداستىعى جۇمىسىن قالىپتى جاعدايدا جالعاستىرۋدا.
ويتكەنى بۇل ۇيىمدى سىزدەرمەن بىزگە تاۋەلسىزدىگىمىز اكەپ بەردى، 1992-جىلى الەم قازاقتارى جينالىپ العاشقى قۇرىلتايىندا قاۋىمداستىقتى قۇردى، جارعىسىن بەكىتتى. سودان بەرگى 32 جىلدا الەم قازاقتارى قازاق ەلىنىڭ تۋىن بىرگە كوتەرىپ، ەلىم، جەرىم، وتانىم دەپ توبەلەرى كوككە جەتتى، قازاق جەرىندە «ءار قازاق - مەنىڭ جالعىزىم» ۇرانى قالىپتاستى.
ەندى ءبىز بار قازاق ءبىر قازاقپىز، وسى قاسيەتتى ۇيىمنىڭ ارجاعىندا پرەزيدەتىمىز، ۇكىمەتىمىز بار، الەم قازاقتارىنىڭ تاعدىرىن شەشۋگە قازاق ەلىنىڭ داۋلەتى دە اۋلەتى جەتەدى. پرەزيدەنت اكىمشىلىگى وسى ماسەلەلەرگە مۇقيات قاراپ، قورتىندى جاساپ وتىرعاندىقتان، دۇنيەجۇزى قازاقتارىنىڭ قاۋىمداستىعى جايلى الاڭداۋدىڭ ەشبىر رەتى جوق.
د ق ق-عى ءتوراعا ءبىرىنشى ورىنباسارى زاۋىتبەك تۇرىسبەكوۆ
meirimdiqogam.kz
