الماتى جولدارى جاڭا تەحنولوگيامەن سالىنادى - ەربولات دوسايەۆ
بۇل تۋرالى قالا اكىمى ەربولات دوسايەۆ ەلوردادا ورتالىق كوممۋنيكاتسيالار قىزمەتىندە ايتتى، دەپ حابارلايدى قازاقپارات ءتىلشىسى.
«قابىلدانعان جاڭا باس جوسپاردى ەسكەرە وتىرىپ، قالانىڭ كولىك كارتاسىن قالىپتاستىرۋ جۇمىستارى بەلسەندى جۇرۋدە. ۇلكەن الماتى اينالما جولىنا التى راديالدى جولدى ۇزارتۋ جۇمىسى ءجۇرىپ جاتىر. بۇگىنگى تاڭدا موڭكە ءبي كوشەسى بويىنشا قوزعالىس اشىق، ساين جانە رىسقۇلوۆ داڭعىلدارى ۇزارتىلادى. اباي داڭعىلى، سولتۇستىك اينالىم جانە تىلەنييەۆ كوشەلەرى بويىنشا جوبالىق-سمەتالىق قۇجاتتاما ازىرلەنۋدە»، - دەدى ەربولات دوسايەۆ.
ونىڭ ايتۋىنشا، ۇلكەن الماتى اينالما اۆتوجولىن اشۋ مەگاپوليستىڭ جول جۇكتەمەسىن ورتا ەسەپپەن %20 كە ازايتادى.
بۇل مەملەكەت باسشىسىنىڭ ۇلكەن جۇك تاسۋشى كولىكتەردى قالاعا كىرگىزبەۋ تاپسىرماسىن ورىنداۋدى قامتاماسىز ەتەدى.
«ايتسە دە، جول ينفراقۇرىلىمىنىڭ نەگىزگى پروبلەمالارى - جول توسەمىنىڭ ساپاسى جانە جول ليۋكتەرىنىڭ ورنىنان قوزعالۋى سەكىلدى اقاۋلار بولىپ وتىر. بۇل جولداردى جاڭارتۋدا جاڭا تاسىلدەردى قاجەت ەتەدى. 2022-جىلى پيلوتتىق رەجيمدە جولداردىڭ ساپاسىن جاقسارتۋ ءۇشىن اسفالت-بەتون قوسپاسىنا پوليمەرلى قوسپالار سىندى جاڭا ماتەريالداردى قولداندىق. ولار اۋىرتپالىققا جانە كليماتتىق جاعدايلارعا ءتوزىمدى. بيىل 6 شاعىناۋداندا 25 شاقىرىم جاڭا جول سالۋدى جانە 200 شاقىرىم ورتاشا جوندەۋ جۇرگىزۋدى جوسپارلاپ وتىرمىز. وندا 15 ماگيسترالدىق جولداردا پوليمەرلى قوسپالاردى پايدالانۋدى جوسپارلاپ وتىرمىز. وسى جۇمىستار شەڭبەرىندە مەحانيكالىق جانە تەمپەراتۋرالىق جۇكتەمەلەرگە توتەپ بەرەتىن 8 مىڭ «جىلجىمالى» ليۋكتەر ورناتىلادى»، - دەپ ءتۇسىندىردى ە. دوسايەۆ.
قالا اكىمى جاڭا تەحنولوگيالاردى قولدانۋ ورتاشا جوندەۋ جۇرگىزۋ مەرزىمىن 5 جىلدان 10 جىلعا دەيىن ۇزارتاتىنىن باسا ايتتى.
