دەپۋتات قاراسورانى مەديتسينالىق ماقساتتا پايدالانۋدى ۇسىندى

استانا. قازاقپارات - سەناتور بەكبولات ورىنبەكوۆ ءوزىنىڭ دەپۋتاتتىق ساۋالىندا ەلىمىزدىڭ وڭتۇستىك وڭىرلەرىندەگى ەسىرتكى زاتىنىڭ كەڭىنەن تارالۋ پروبلەماسىن كوتەردى، دەپ حابارلايدى قازاقپارات ءتىلشىسى.

دەپۋتاتتىڭ ايتۋىنشا، شۋ القابىندا 140 مىڭ گەكتار جەردە جابايى قاراسورا وسەدى. تابىستىڭ جوقتىعىنان جاستار وسى وسىمدىكتەن وندىرىلەتىن ەسىرتكى زاتتارىن تاراتۋدا. سەناتور سونىمەن قاتار شەتەلدەن كەلەتىن سينتەتيكالىق ەسىرتكىنىڭ جىلدام تارالىپ جاتقانىن ايتتى.

«دەنساۋلىق ساقتاۋ مينيسترلىگىنىڭ دەرەكتەرى بويىنشا ەسەپتە تۇرعان ەسىرتكىگە تاۋەلدى 18136 ادام بار. ىشكى ىستەر ورگاندارى بيىلعى 5 ايدىڭ قورىتىندىسى بويىنشا 1072 ەسىرتكى قىلمىسىن انىقتادى. وعان قوسا اسا ءىرى مولشەردە ەسىرتكى زاتتارىن ساقتاۋدىڭ 203 فاكتىسى انىقتالدى. جالپى كۇش-جىگەرمەن ەسىرتكى قىلمىسىنىڭ الدىن الۋ ماسەلەسى مۇلدەم باسقا دەڭگەيگە كوتەرىلىپ، ايماقتاعى جانە جالپى رەسپۋبليكاداعى ەسىرتكى جاعدايىن تۇبەگەيلى تۇزەتۋگە ءتيىس»، - دەدى ب. ورىنبەكوۆ.

سەناتوردىڭ پىكىرىنشە، وسى وسىمدىكتى ارنايى ماقساتتا پايدالانۋ ارقىلى دالادا وسەتىن قاراسورا ماسەلەسىن شەشۋگە بولار ەدى. دەپۋتات ول ءۇشىن بىرنەشە ۇسىنىس ايتتى.

«قولدانىستاعى تاجىريبەنى ەسكەرە وتىرىپ، زاڭنامانى زەردەلەۋ، ولقىلىقتاردى انىقتاۋ جانە ولاردى جويۋ بويىنشا ۇسىنىستار ەنگىزۋ كەرەك. ونەركاسىپتىك نەمەسە مەديتسينالىق ماقساتتاردا وسىمدىك شيكىزاتىن قايتا وڭدەۋ بويىنشا، ونىڭ ىشىندە «تاراز حيمپاركى» ارنايى ەكونوميكالىق ايماعىندا وزىق تەحنولوگيانى ەنگىزۋ ارقىلى وندىرىستەر كەشەنىن جاساۋ كەرەك. «قازاقستان- عارىش ساپارى» تەحنولوگياسىن پايدالانا وتىرىپ، ونىڭ شوعىرلانۋ وشاقتارىنىڭ كارتاسىن جاساپ، جابايى وسەتىن قاراسورانىڭ ءوسۋ الاڭىن زەرتتەۋ كەرەك»، - دەدى سەناتور.