دەپۋتات ق ت ج جۇمىسىنداعى كەمشىلىكتەردى ايتتى
«ۇزىندىعى 277 شاقىرىم «اتىراۋ-استراحان» تاسجولىنىڭ قۇرىلىسى 2019-جىلى باستالىپ، جوسپار بويىنشا 2021-جىلى ءبىتۋى ءتيىس ەدى. الايدا بەس جىل بۇرىن باستالىپ، ەكى جىل بۇرىن ءبىتۋى ءتيىس جولدىڭ قۇرىلىسى وتە باياۋ ءجۇرىپ جاتىر. جۇمىستىڭ جۇرمەۋىنىڭ باستى سەبەبى - قۇرىلىس ماتەريالدارىنىڭ ۋاقىتىلى جەتكىزىلمەۋى جانە تاسىمالداۋشىلاردىڭ ۆاگونداردى جەتكىلىكتى دەڭگەيدە قامتاماسىز ەتپەۋى. بۇل جالپى ەلىمىز بويىنشا ەكونوميكامىزدىڭ وسۋىنە، سونىڭ ىشىندە قۇىرىلىس سالاسىنىڭ دامۋىنا ۇلكەن كەدەرگى بولىپ وتىر»، - دەدى ءا. جۇبانوۆ باس پروكۋرور بەرىك اسىلوۆتىڭ اتىنا جولداعان ساۋالىندا.
ونىڭ ايتۋىنشا، قازىرگى كەزدە ق ت ج ۇلتتىق كومپانياسىنىڭ جالپى قارىزى 2,2 تريلليون تەڭگەگە جەتكەن.
«ەگەر بۇگىندە ۇلتتىق كومپانيا كاسىپكەرلەرگە جاساندى تۇردە اكىمشىلىك كەدەرگىلەر جاساپ جاتسا، ق ت ج قارىزىن قالاي وتەمەك؟ سونىمەن بىرگە، كىرىستىڭ ەڭ تابىستى بولىگى سانالاتىن جۇك تاسىمالى قىزمەتىن ۇلتتىق كومپانيا نەلىكتەن باسەكەلەستىك ورتاعا بەرەدى؟ بۇل ارەكەتتەردىڭ بارلىعى ۇلتتىق كومپانيانىڭ كىرىسىنە اسەر ەتىپ، جوبالاردى، ونىڭ ىشىندە ۇلتتىق جوبالاردى جۇزەگە اسىرۋعا كەدەرگى كەلتىرىپ وتىرعانىن ايتقىم كەلەدى. ۆاگوندار توڭىرەگىندە قالىپتاسقان جاعداي تاۋار باعاسىنا اسەر ەتىپ، ينفلياتسيا مەن ەلدىڭ الەۋمەتتىك-ەكونوميكالىق جاعدايىنا زيانىن تيگىزىپ جاتىر. نەگىزىندە، ەكونوميكامىزدىڭ كۇرە تامىرى سانالۋى ءتيىس «قازاقستان تەمىر جولى» كومپانياسىنا قاراتا ايتىلاتىن سىن وتە كوپ. سەبەبى، قوعام ىشىندە كومپانيا قىزمەتى كولەڭكەلى سحەمالارعا تولى جانە اشىقتىق، ەسەپتىلىك جوق دەگەن پىكىر بار»، - دەدى دەپۋتات.
بۇل تۇرعىدا ول باس پروكۋروردان ۇلتتىق كومپانياعا قاتىستى تولىق قارجىلىق تالداۋ جاساۋدى جانە الىنعان قارىزداردىڭ ماقساتتى جۇمسالۋى بويىنشا جۇيەلى تەكسەرۋ جۇرگىزۋدى سۇرادى.
«سونىمەن قاتار، ق ت ج- نىڭ قازىرگى جانە بۇرىنعى باسشىلىعىنىڭ ۆاگونداردى جالعا بەرەتىن جەكە لوگيستيكالىق كومپانيالارعا قاتىستىلىعىنا تەكسەرۋ جۇرگىزۋ كەرەك. مۇنىمەن قوسا، جۇك تاسىمالى قىزمەتىن باسەكەلەس ورتادان ۇلتتىق كومپانياعا قايتارۋ ماڭىزدى»، - دەدى ءادىل جۇبانوۆ.
