پرەزيدەنت ۆولونتەرلىك قىزمەتتى دامىتۋ باعىتىندا قۇزىرلى ورگانداردىڭ الدىنا ناقتى مىندەتتەر قويدى

None
استانا. قازاقپارات - مەملەكەت باسشىسى حالىقارالىق ۆولونتەرلەر فورۋمىنا قاتىستى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

پرەزيدەنت ءوز سوزىندە مەملەكەت پەن قوعامنىڭ سەنىمدى سەرىكتەستىگى ماڭىزدى ەكەنىن اتاپ ءوتىپ، ەرىكتىلەر قوعامدا ايرىقشا ءرول اتقاراتىنىن ايتتى.

- قازاقستاندا 2020 -جىل ەرىكتىلەر جىلى بولدى، ءبىراز شارۋا اتقارىلدى. ءقازىر ەلىمىزدەگى ۆولونتەرلىك ۇيىمدار سانى 3 ەسە ءوستى، ياعني 680 ۇيىم بار. ەرىكتىلەردىڭ سانى 200 مىڭعا جەتتى. بارلىق ايماقتا فرونت-وفيستەر اشىلدى. وندا مىڭداعان ۆولونتەر دايىندىقتان ءوتتى. Qazvolunteer.kz پلاتفورماسى جاسالدى. ياعني، بۇگىنگى تاڭدا قازاقستاندا كەز كەلگەن ادام ەرىكتىلەر توبىنا مۇشە بولىپ، پايدالى ىسكە ءوز ۇلەسىن قوسا الادى. شىن مانىندە، بۇل - زور مۇمكىندىك. سونداي-اق ءبىزدىڭ ۆولونتەرلەر يوردانيا، كەنيا، تايلاند جانە تۇركيا ەلدەرىنە ارنايى بارىپ، تاجىريبە جيناقتادى. وسى تۇستا مەن قازاقستان ەرىكتىلەرىنە قولداۋ كورسەتىپ جۇرگەن بىرىككەن ۇلتتار ۇيىمىنىڭ وكىلدەرىنە العىس ايتامىن، - دەدى قاسىم-جومارت توقايەۆ.

پرەزيدەنت ۆولونتەر بولۋ، ەڭ الدىمەن، پاتريوتيزمنىڭ، ياعني وتانشىلدىقتىڭ جارقىن كورىنىسى دەپ سانايدى. بۇل - ادامگەرشىلىك قۇندىلىقتارىن بارىنەن جوعارى قوياتىن جانداردىڭ ءومىر سالتى.

- ەرىكتىلەر ونەگەلى ىستەرى ارقىلى قوعامدى دامىتۋعا زور ۇلەس قوسادى. جاناشىرلىق - قازاقتىڭ قانىندا بار قاسيەت. حالقىمىز قيىندىققا تاپ بولعان ادامداردان كومەگىن اياماعان. ەل باسىنا كۇن تۋعان قيىن- قىستاۋ ساتتە «ءبىر جەڭنەن قول، ءبىر جاعادان باس شىعارا» بىلگەن. قازاقستانعا جەر اۋدارىلعان تالاي ەتنوس وكىلدەرىن باۋىرىنا باسىپ، بارىن بولىسكەن. سوندىقتان بۇگىنگى جيىننىڭ ماقساتى حالقىمىزدىڭ بولمىسىمەن ۇندەس ەكەنى ءسوزسىز، - دەدى مەملەكەت باسشىسى.


پرەزيدەنت ادىلەتتى قازاقستاندى ادال ازاماتتار قۇراتىنىن اتاپ ءوتىپ، بارلىق ەرىكتىلەردى ادال ازامات دەۋگە بولاتىنىن ايتتى.

- ماعان ەرىكتىلەر مەن قايىرىمدى جانداردىڭ «كەڭ اۋقىمدا ويلا، سوعان ساي ارەكەت ەت» دەگەن قاعيداعا سۇيەنىپ جۇمىس ىستەيتىنى ۇنايدى. شىن مانىندە، ەرتەڭگى جارقىن بولاشاققا جەتۋ ءۇشىن ءبىز بۇگىن باتىل قادامدار جاساۋىمىز كەرەك. بۇل ۇستانىم ەكولوگيالىق مادەنيەت پەن سانالى تۇتىنۋ ءداستۇرىن قالىپتاستىرۋ ءۇشىن وتە وزەكتى. ول ءۇشىن ادامداردىڭ سانا-سەزىمى مەن دۇنيەتانىمىن وزگەرتۋ كەرەك. تەك سوندا عانا رەفورمالاردىڭ ناتيجەسى تۇراقتى ءارى ماڭگىلىك سيپاتقا يە بولادى. تۇلعانىڭ جەكە ۇلگى كورسەتۋى جانە «تەڭ-تەڭىمەن» قاعيداتىن ۇستانۋى ۆولونتەرلىكتىڭ نەگىزگى قوزعاۋشى كۇشى دەپ سانايمىن. يدەيالاردى بەلسەندى تۇردە تاراتۋ جانە قايىرىمدىلىقتى ناسيحاتتاۋ قوعام دامۋىنىڭ جاۋاپتى ازامات جانە پاتريوتيزم ۇعىمدارىنا نەگىزدەلگەن جاڭا پاراديگمالارىن قالىپتاستىرۋعا ىقپال ەتەدى. وسى سەبەپتى ەلىمىزدە ۆولونتەرلىك قوزعالىستىڭ دامۋىن ىلگەرىلەتۋ ءۇشىن بارىنشا جاعداي جاسالادى، - دەدى مەملەكەت باسشىسى.

پرەزيدەنتتىڭ ايتۋىنشا، قازاقستاندا 2021-2023 -جىلدارعا ارنالعان ۆولونتەرلىكتى دامىتۋ جول كارتاسى اياسىندا ءبىرقاتار جوبا تابىستى ىسكە اسىرىلدى. مەملەكەت باسشىسى قوعامدا ەرىكتىلىك مەن قايىرىمدىلىق ءداستۇرىن نىعايتۋ ءۇشىن بىرنەشە كەشەندى شارا قابىلداۋدى ۇسىندى.

- وسى سالاداعى ستراتەگيالىق باعىتتاردى ناقتى كورسەتەتىن جاڭا جول كارتاسىن ازىرلەۋ كەرەك. اتالعان قۇجات ۆولونتەرلىك قوزعالىسقا تىڭ سەرپىن بەرىپ، ونىڭ تاياۋ جىلدارداعى دامۋىنىڭ باستى باعىتتارىن ايقىنداۋعا ءتيىس. ەكىنشىدەن، ەرىكتىلىك مەن قايىرىمدىلىق ءىسىن ەسەپكە الاتىن جۇيەنى كەزەڭ- كەزەڭىمەن ەنگىزۋ قاجەت. بۇل باستاما ۆولونتەرلىك قوزعالىستى ىنتالاندىرۋ ءۇشىن زاڭنامالىق دەڭگەيدە ءتيىمدى شارالار قابىلداۋعا مۇمكىندىك بەرەدى. ۇشىنشىدەن، ۆولونتەرلىك قوزعالىستى ۇزاقمەرزىمدى گرانت بەرۋ ارقىلى ىنتالاندىرۋ كەرەك.

بۇل رەتتە مەملەكەتتىك جانە جەكەمەنشىك گرانت بەرۋشىلەر اراسىندا تۇراقتى سەرىكتەستىك ورناتىپ، وتاندىق جانە حالىقارالىق دونورلاردىڭ ءبىر-بىرىمەن ناتيجەلى ىنتىماقتاستىعىن قالىپتاستىرۋ ماڭىزدى. تورتىنشىدەن، ۆولونتەرلىك جانە قايىرىمدىلىق ىستەردى ينستيتۋتتىق تۇرعىدا قولداۋ ينفراقۇرىلىمىن دايەكتى تۇردە دامىتقان ءجون. ول ءۇشىن ۆولونتەرلەردىڭ ۇلتتىق جانە ايماقتىق دەڭگەيدەگى فرونت-وفيسىنىڭ ۇيىمداستىرۋشىلىق، تەحنيكالىق جانە كادرلىق الەۋەتىن كۇشەيتۋ قاجەت. بەسىنشىدەن، ۆولونتەرلىك قىزمەت سالاسىنداعى حالىقارالىق ىنتىماقتاستىقتى ودان ءارى نىعايتۋعا جانە ىلگەرىلەتۋگە ەرەكشە نازار اۋدارۋ قاجەت، - دەدى قاسىم-جومارت توقايەۆ.

ءسوزىنىڭ سوڭىندا پرەزيدەنت اتالعان فورۋم بۇل باعىتتاعى ورتاق جۇمىس وزەكتى ءارى وتە قاجەت ەكەنىن جانە ەلىمىزدەگى ۆولونتەرلىك قوزعالىستى دامىتۋعا تىڭ سەرپىن بەرەتىنىن اتاپ ءوتتى.

ب ۇ ۇ باس حاتشىسى انتونيۋ گۋتەرريشتىڭ فورۋم قاتىسۋشىلارىنا ۇندەۋىن ۇيىمنىڭ قازاقستانداعى تۇراقتى ۇيلەستىرۋشىسى ميكاەلا فريبەرگ-ستوري وقىپ بەردى. سونداي-اق جيىندا ب ۇ ۇ ەرىكتىلەر باعدارلاماسىنىڭ اتقارۋشى ۇيلەستىرۋشىسى تويلي كۋربانوۆ، ب ا ءا تولەرانتتىلىق جانە بەيبىت قاتار ءومىر ءسۇرۋ مينيسترلىگىنىڭ باس ديرەكتورى افرا مۇحاممەد ءال سابري، تۇركيانىڭ بەلگىلى مادەنيەت قايراتكەرى حالۋك لەۆەنت جانە باسقا دا سپيكەرلەر ءسوز سويلەدى.


سوڭعى جاڭالىقتار