اقتوبەدە قوي جۇنىنەن قۇرىلىس ماتەريالى جاسالادى

اقتوبە. قازاقپارات - اقتوبە قالاسىندا قوي ءجۇنى وڭدەلىپ، ودان جىلۋ ساقتايتىن قۇرىلىس ماتەريالى دايىندالادى. كەشە زاۋىتتىڭ ىرگەتاسىن قالاۋ ءراسىمى ءوتتى، دەپ حابارلايدى قازاقپارات ءتىلشىسى.

اقتوبەدە «KazFeltec» ج ش س بولاشاق توقىما ەمەس ماتەريالدار شىعاراتىن زاۋىتتىڭ ىرگەتاسىنا كاپسۋلا سالىندى.

شاراعا اقتوبە وبلىسىنىڭ اكىمى ەرالى توعجانوۆ، «KazFeltec» ج ش س ديرەكتورى ەرلان جاڭابەرگەنوۆ، كومپانيا قىزمەتكەرلەرى قاتىستى.

ايتا كەتەيىك، وبلىس اكىمدىگى، «KazFeltec» ج ش س جانە يتالياندىق Corm اراسىندا كونسورتسيۋم قۇرۋ تۋرالى كەلىسىم بىلتىرعى كۇزدە جاسالدى.

زاۋىت شىعاراتىن نەگىزگى ءونىم - ەكولوگيالىق تازا ءارى جىلۋ ساقتاۋ ماتەريالدارى.

شيكىزات رەتىندە قىلشىقتى قوي ءجۇنى پايدالانىلادى. ازىرگە شارۋالار ءجۇندى ورتەپ، كەيبىرى قوقىسقا لاقتىرىپ جاتىر.

الدىڭعى اپتادا جاڭا وندىرىسكە وبلىس بويىنشا شيكىزات ساتىپ الۋ باستالدى. بۇل اۋىل تۇرعىندارى ءۇشىن قوسىمشا تابىس كوزىنە اينالادى.

«بۇگىنگى كۇنى مەملەكەت تاراپىنان حالىقتىڭ تابىسىن ارتتىرۋ، الەۋمەتتىك جاعدايىن جاقسارتۋ ماقساتىندا بۇرىن- سوڭدى بولماعان، اۋقىمدى شارالار قابىلدانۋدا. سونىڭ دالەلى - «اۋىل اماناتى» جوباسى. اتالعان جوبانىڭ ءبىر باعىتىنىڭ وزىندە، 500 گە جۋىق ادام 18 مىڭ قوي ساتىپ الۋعا نيەتتى. بۇگىنگى كۇننىڭ وزىندە وبلىستا 1 ميلليون 400 مىڭ باس قوي تىركەلگەن. جىل سايىن ورتا ەسەپپەن 2-2,5 مىڭ توننا ءجۇن وندىرىلەدى. بۇل رەتتە ءجۇندى ساتۋ مال شارۋاشىلىعىنداعى پروبلەمالاردىڭ ءبىرى. بۇگىن بۇل ماسەلە ءوز شەشىمىن تاپقان كۇن. ءبىز اۋىل شارۋاشىلىعىنىڭ بارلىق پروبلەمالىق ماسەلەلەرىن كەزەڭ-كەزەڭىمەن شەشۋگە تىرىسامىز»، - دەپ اتاپ ءوتتى وبلىس اكىمى ەرالى توعجانوۆ.

ءونىمنىڭ ءبىرىنشى لەگى جىل سوڭىندا شىعارىلادى. جاڭا كاسىپورىن 25 ادامدى تۇراقتى جۇمىسپەن قامتيدى.

سونىمەن قاتار، وبلىس اۋداندارىندا شيكىزات قابىلداۋ پۋنكتتەرىن اشۋ جوسپارلانعان. بۇل جەرگىلىكتى حالىقتى جۇمىسپەن قامتۋعا مۇمكىندىك بەرەدى.

جوباعا تارتىلعان ينۆەستيتسيانىڭ جالپى كولەمى - 5,2 ميلليارد تەڭگە.

زاۋىت قۋاتى جىلىنا - 2100 توننا. جەرگىلىكتى نارىقتان بولەك، ونىمدەر ەۋروپاعا ەكسپورتتالادى دەپ جوسپارلانعان.