حالىقتى قانايتىن ورتالىققا اينالىپ بارادى. الماتى تۇرعىندارى ح ق ك و قىزمەتىنە شاعىمداندى

None
استانا. قازاقپارات – الماتىدا سەگىز حالىققا قىزمەت كورسەتۋ ورتالىعى بار. الايدا سەنبى كۇنى ەكەۋى عانا ءتۇس مەزگىلىنە دەيىن جۇمىس جاسايدى.

بۇل ەكى ميليوننان اسا حالىق تۇراتىن مەگاپوليس ءۇشىن قانشالىقتى قولايلى؟ Massaget.kz ءتىلشىسى ح ق ك و-نىڭ سەنبى كۇنگى جۇمىسىن باقىلاپ كوردى.

بەس كۇن بويى جۇمىستان قولى بوسامايتىن بۇقارا شارۋاسىنىڭ باسىم بولىگىن دەمالىس كۇندەرى تىندىرۋعا تىرىسادى. الايدا ماسەلەسى ح ق ك و-مەن بايلانىستى بولسا تىپتەن قيىن. سەبەبى ءوز ۇيىنە جاقىن ماڭداعى ورتالىقتار جۇمىس جاساماعاندىقتان حالىقتىڭ باسىم بولىگى اۋەزوۆ جانە المالى اۋداندارىنا اعىلادى ەكەن.

«ۇيىمە جاقىن ماڭداعى ح ق ك و جابىق تۇر. قىزمەتكەرلەر وسى جاققا نۇسقادى. باسقا كۇندەرى جۇمىستا بولعاندىقتان بارا المايمىز. ساعات تۇسكى بىرگە دەيىن جۇمىس جاساعاندىقتان بۇل جاقتا كەزەك كوپ. سوندىقتان سەنبى كۇندەرى تولىق جۇمىس جاساسا جاقسى بولار ەدى»، - دەيدى كەلۋشىلەردىڭ ءبىرى.

بۇل پىكىردى بىرنەشە تۇرعىن قولادي كەتتى. حالىقتىڭ باسىم بولىگى ورتالىقتاردىڭ قىزمەتىنە كوڭىلى تولمايتىنىن جەتكىزدى. سەبەبى كەيدە ءبىر قاعازدى الۋ ءۇشىن اپتالاپ كۇتىپ قالاتىن ساتتەر ءجيى كەزدەسەدى دەپ وتىر. احمەت وماروۆ تا تۇرعىلىقتى مەكەن-جايىن اۋىستىرۋ ءۇشىن ءۇش-ءتورت كۇن ۋاقىتىن سارپ ەتكەن.

«پروپيسكامدى اۋىستىرۋ ءۇشىن كەلگەنمىن. ءبىر پلانشەت قانا ىستەيدى دەدى. ونىڭ ءوزى ىستەن شىعىپ، قۇجاتتاردى قابىلدامايدى دەپ قايتارىپ جىبەردى. ىستەگەننەن كەيىن ءوزىمىز حابارلاسامىز دەپ تەلەفون ءنومىرىمدى الىپ قالدى. مۇنداي جاعداي ءبارىنىڭ باسىنان وتكەن شىعار. تۋىستارىمنان دا كوپ ەستيمىن. قازىر كەيبىر قىزمەت اقىلارى دا ءوسىپ بارادى. بۇل ءتىپتى قيىن ءتيىپ جاتىر. ح ق ك و حالىقتى قانايتىن، قينايتىن ورتالىققا اينالىپ بارادى» دەيدى ول.

ايدىڭ كۇنىنىڭ امانىندا قىزمەتى اقساپ تۇراتىن ح ق ك و-نىڭ قۇزىرىنا 1-شىلدەدەن باستاپ ا ح ا ج ءبولىمىنىڭ كەيبىر مىندەتتەرى بەرىلمەك. سونداي-اق، سيفرلىق دامۋ، يننوۆاتسيالار جانە اەروعارىش ونەركاسىپ مينيسترلىگىنىڭ جوبالىق بۇيرىعىندا ا ح ا ج بولىمىنە قاتىستى قىزمەتتەردى الۋدىڭ جاڭا باعاسى كورسەتىلگەن.

مىسالى ەسىمىمدى اۋىستىرىپ، ونى زاڭدى تۇردە راسىمدەيمىن دەگەندەر بۇل قىزمەتكە 8500 تەڭگە تولەيدى. نەكە قيۋ-9500 جوعارى. بۇرىن بۇل قىزمەتكە مەملەكەتتىك باج 1 ا ە ك ياعني، 3450 تەڭگە بولاتىن. ال ازاماتتىق حال اكتىلەرىن مەملەكەتتىك تىركەۋ بويىنشا جۇمىستار، ياعني تۋۋ، قايتىس بولۋ تۋرالى كۋالىكتەرگە وزگەرىستەر ەنگىزۋ جانە بۇدان وزگە قىزمەتتەرگە ەندى 8-9 مىڭ تەڭگەنىڭ اينالاسىندا تولەۋگە تۋرا كەلەدى. بۇرىن بۇل قىزمەتتەر تەگىن بولىپ كەلگەن ەدى.

قىمباتشىلىق قوس بۇيىرىنەن قىسقان اعايىنعا بۇل دا ءبىر اۋىر جۇك بولدى. ونىڭ ۇستىنە بۇل قۇجاتتاردىڭ باستاپقى باعاسى. سەبەبى كەرەك قاعازىڭىزدى قىسقا ۋاقىتتىڭ ىشىندە الۋ ءۇشىن قوسىمشا اقى تولەيسىز. ماسەلەن حالىقارالىق ءتولقۇجات 27600 تەڭگە تۇرادى. ول 13 جۇمىس كۇنىندە دايىن بولادى ەكەن. ال ەگەر ءۇش كۇن ىشىندە دايىن بولسىن دەسەڭىز 2752 تەڭگە، سول كۇنى قولىڭىزعا الۋ ءۇشىن قوسىمشا 4983 تەڭگە تاعى تولەۋ كەرەك.

مەملەكەتتىك قىزمەتتەرگە باعانى كوتەرۋ ءبىرىنشى كەزەكتە حالىقتىڭ از قامتىلعان توپتارىنا ايتارلىقتاي اۋىرتپاشىلىق اكەلەدى. ويتكەنى قارجىسى قات قوعامدا بۇقارا بۇل قىزمەتتەردى ورىنداۋعا اسىقپايدى. ال ەسەپكە الۋ، ەسەپتەن شىعارۋ جۇمىستارى تۇراقتى بولماسا بىلىقتىڭ كوبەيەتىنى دە جاسىرىن ەمەس. ءبىر قاراعاندا: اقشاسىن تولەسەڭ تەز دايىنداپ بەرەمىز، - دەگەن جۇيەنىڭ ءوزى حالىقتى توناۋعا يەكەمدەپ تۇرعانداي. ونسىز دا اقىسىن تولەپ جاتقان قىزمەتكە قوسىمشا اقشا تالاپ ەتۋ اقىلعا تومپاق دۇنيە.

سوڭعى جاڭالىقتار