قاسىم-جومارت توقايەۆ گەرمانيانىڭ فەدەرالدى پرەزيدەنتى فرانك- ۆالتەر شتاينمايەردى اقوردادا قارسى الدى
مارتەبەلى مەيماننىڭ ساپارىنا وراي سالتاناتتى راسىمدەر زالىندا قۇرمەت قاراۋىلى ساپ تۇزەپ، ونىڭ باستىعى مەملەكەت باسشىلارىنا سالەمدىك بايانات بەردى. وسىدان كەيىن پرەزيدەنتتىك وركەستر ەكى ەلدىڭ مەملەكەتتىك ءانۇراندارىن ورىندادى. ءانۇرانداردى تىڭداپ بولعاننان كەيىن فرانك- ۆالتەر شتاينمايەر مەن قاسىم- جومارت توقايەۆ كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى. ونىڭ الدىنا كەلگەندە مەيمان توقتاپ، باسىن ءسال ءيىپ، ءوزىنىڭ قۇرمەتىن ءبىلدىردى. سونان سوڭ مەيمان مەن پرەزيدەنت قۇرمەتتى قاراۋىل ساپىنىڭ بويىمەن ءجۇردى. گەرمانيانىڭ فەدەرالدى پرەزيدەنتى قۇرمەتتى قاراۋىل باستىعىمەن قوشتاسىپ، قازاقستان پرەزيدەنتىمەن شاعىن قۇرامداعى كەزدەسۋگە ءوتتى.
بۇعان دەيىن قازاقستان پرەزيدەنتىنىڭ شاقىرۋىمەن ەلىمىزگە گەرمانيانىڭ فەدەرالدى پرەزيدەنتى فرانك- ۆالتەر شتاينمايەر مەملەكەتتىك ساپارمەن كەلگەنىن جازعان ەدىك.
ساپار اياسىندا ەكى مەملەكەت باسشىلارى قازاقستان- گەرمانيا ستراتەگيالىق سەرىكتەستىگىن نىعايتۋ ماسەلەلەرى بويىنشا كەلىسسوز جۇرگىزىپ، ونىڭ قورىتىندىسى بويىنشا ءبىرقاتار ەكىجاقتى قۇجاتتارعا قول قويادى دەپ جوسپارلانعان.
