مەملەكەت باسشىسى باقىتجان ەرتايەۆتى قابىلدادى

None
استانا. قازاقپارات - مەملەكەت باسشىسى قاسىم- جومارت توقايەۆ باقىتجان ەرتايەۆتى قابىلدادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

پرەزيدەنت كەزدەسۋ بارىسىندا باقىتجان ەرتايەۆتىڭ وسكەلەڭ ۇرپاققا اسكەري- پاتريوتتىق تاربيە بەرۋ ماسەلەلەرى جونىندەگى وي- پىكىرىن تىڭدادى.

مەملەكەت باسشىسى جۋىردا تۇركىستاندا وتكەن ۇلتتىق قۇرىلتايدا ادىلەتتى قازاقستاننىڭ نەگىزىن قالايتىن ادال ازامات تۋرالى ويلارىن ورتاعا سالعانىن اتاپ ءوتتى. بۇدان بولەك، سىن ساعاتتا باسىن قاتەرگە تىگىپ، جانقيارلىقپەن ەرلىك تانىتقان، وتانىنا ادال قىزمەت ەتكەن تۇلعالاردى جاستارعا ۇلگى ەتۋ جانە قاراپايىم ەڭبەك ادامىن دارىپتەۋ ماڭىزدى ەكەنىنە نازار اۋداردى.

گەنەرال- لەيتەنانت باقىتجان ەرتايەۆ ءوزى باسشىلىق ەتەتىن «Tayelsiz Qazaqstannyn Halyq Batyrlary» قوعامدىق بىرلەستىگىنىڭ اتقارىپ جاتقان جۇمىستارى جونىندە باياندادى. سونداي- اق اسكەردەگى تاربيە ءىسىن نىعايتۋ جونىندە ۇسىنىستارىن جەتكىزدى.

پرەزيدەنت ۇيىمنىڭ باستامالارىنا مەملەكەت تاراپىنان قولداۋ كورسەتىلەتىنىن ايتتى. سونىمەن قاتار باقىتجان ەرتايەۆتىڭ تاۋەلسىز قازاقستاننىڭ قارۋلى كۇشتەرىن قۇرۋعا ەلەۋلى ەڭبەك سىڭىرگەنىن اتاپ ءوتىپ، ونىڭ ەل يگىلىگى ءۇشىن اتقارىپ جاتقان قوعامدىق جۇمىستارىنا تابىس تىلەدى.

سوڭعى جاڭالىقتار