سەمەي ورمانىن قالپىنا كەلتىرۋگە قانشا ۋاقىت كەتەدى

استانا. قازاقپارات - ول ءۇشىن ونداعان جىل كەرەك. اباي وبلىسىندا ورتكە ورانعان ورماندى قالىپقا كەلتىرۋگە قانشا ۋاقىت كەتەتىنىنە قاتىستى جاۋاپ بەرگەن ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا وسىلاي مالىمدەدى، دەپ حابارلايدى قازاقپارات ءتىلشىسى.

«قازىر شامامەن 60 مىڭ گەكتار دەپ ايتىپ جاتىرمىز. بۇل جەردە ءورتتىڭ وقشاۋلانعانعا دەيىنگى اۋماعىن ايتىپ وتىرمىز. ال ورماندى قالىپقا كەلتىرۋگە قانشا ۋاقىت كەتەدى؟ ورتتەن كەيىن قىزمەتتىك تەكسەرىس جۇرەدى. العاشقى كەزەڭدە جانعان اۋماقتى تازارتۋ جۇمىستارى اتقارىلادى. وعان شامامەن 3-4 جىل كەتەدى. ورماندى قايتا قالپىنا كەلتىرۋ - وتە كۇردەلى ءىس. ول ءۇشىن ونداعان جىل كەرەك»، - دەپ جاۋاپ بەردى مينيستر جۋرناليستەردىڭ ساۋالىنا وراي.

ەسكە سالا كەتەيىك، سەمەي تابيعي رەزەرۆاتىندا قىزىل جالىن 8- ماۋسىم كۇنى تۇتاندى.

وتتىڭ تارالۋى توقتاتىلدى، الايدا تولىعىمەن ءوشىرۋ جۇمىستارى جالعاسىپ جاتىر.

ءتىلسىز جاۋ سالدارىنان 14 ورمانشى قازا بولدى.