ءاليحان سمايىلوۆ: ۇلت دەنساۋلىعىن نىعايتۋ - مەملەكەتىمىزدىڭ ەڭ ماڭىزدى باسىمدىعى

None
استانا. قازاقپارات - پرەمەر-مينيستر ءاليحان سمايىلوۆ مەديتسينا قىزمەتكەرلەرىن كاسىبي مەرەكەمەن قۇتتىقتادى، دەپ حابارلايدى قازاقپارات.

«سىزدەردى مەديتسينا قىزمەتكەرى كۇنىمەن شىن جۇرەكتەن قۇتتىقتايمىن! ادام ءومىرىن ساقتاپ، دەنساۋلىعىن نىعايتۋ جولىندا اق حالاتتى ابزال جانداردىڭ ەڭبەگى ۇشان-تەڭىز.

ءاردايىم باقىتتى عۇمىر كەشىپ، قيىن دا اۋىر ەڭبەكتەرىڭىزدىڭ جەمىسىن كورىڭىزدەر.

ۇلت دەنساۋلىعىن نىعايتۋ - مەملەكەتىمىزدىڭ ەڭ ماڭىزدى باسىمدىعى.

قاجىر-قايراتتى تالاپ ەتەتىن وسىناۋ مارتەبەلى مىندەت اق حالاتتى ابزال جانداردىڭ يىعىندا ەكەنى ءسوزسىز.

قازاقستاندا مەديتسينانىڭ ءبىرقاتار باعىتى ءقازىردىڭ وزىندە حالىقارالىق دەڭگەيدە تابىستى باسەكەلەستىككە تۇسۋدە. بۇگىندە حالىققا جوعارى تەحنولوگيالىق مەديتسينا قىزمەتتەرى قولجەتىمدى. ۇلتتىق عىلىمي كارديوحيرۋرگيا، ۇلتتىق نەيروحيرۋرگيا، يادرولىق مەديتسينا جانە باسقا دا كوپتەگەن زاماناۋي مەديتسينا ورتالىقتارى جۇمىس ىستەپ تۇر»، - دەپ جازدى ۇكىمەت باسشىسى.

ءا. سمايىلوۆ مەملەكەت باسشىسىنىڭ تاپسىرماسى اياسىندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىن جۇزەگە اسىرۋ باستالعانىن ەسكە سالدى. ونىڭ شەڭبەرىندە بيىل 309 العاشقى مەديتسينالىق-سانيتارلىق كومەك كورسەتۋ نىسانى سالىنادى.

«مەملەكەت الداعى ۋاقىتتا دا قازاقستاندىق دارىگەرلەردىڭ ەڭبەگىن باعالاپ، ءال-اۋقاتىن جاقسارتۋ جولىندا بار كۇش-جىگەرىن سالادى.

ەرەن ەڭبەكتەرىڭىز ءۇشىن مىڭ العىس! سىزدەرگە مىقتى دەنساۋلىق، قاجىماس قايرات، بولاشاققا سەنىم، ابىروي جانە تابىس تىلەيمىن!»، - دەدى پرەمەر- مينيستر.

سوڭعى جاڭالىقتار