ەڭبەك كۇنىن اتاپ ءوتۋدىڭ جاڭا تۇجىرىمداماسى قاجەت - ءاليحان بايمەنوۆ

تۇركىستان. قازاقپارات - ۇلتتىق قۇرىلتايدىڭ ەكىنشى وتىرىسىنا قاتىسقان قازاقستاننىڭ مەملەكەت قايراتكەرى ءاليحان بايمەنوۆ، «ەڭبەك كۇنىن اتاپ ءوتۋدىڭ جاڭا تۇجىرىمداماسى قاجەت» دەگەن پىكىر ءبىلدىردى، دەپ حابارلايدى قازاقپارات ءتىلشىسى.

«مەنىڭ ويىمشا ەڭبەك كۇنىن اتاپ ءوتۋدىڭ جاڭا تۇجىرىمداماسى قاجەت. «ەڭبەك ەرى» دەگەن اتاقتى سول ەڭبەك كۇنىندە بەرۋىمىز كەرەك. سول ەڭبەك كۇنىندە ءتۇرلى سالادا جەتىستىككە جەتكەن ادامداردىڭ ءومىر جولى تۋرالى ءارتۇرلى كەزدەسۋلەر ۇيىمداستىرىپ، حابارلار جاساپ، جاستاردىڭ بويىندا «ەڭبەكپەن جاڭا بيىككە كوتەرىلۋگە بولادى» دەگەن ۇعىم قالىپتاستىرۋىمىز قاجەت. سونداي-اق، ەڭبەك دۇرىس باعالانۋى ءتيىس. ەڭبەك ادامىن قورعايتىن كاسىپداقتاردىڭ ءرولىن كوتەرۋىمىز كەرەك»، - دەدى ول.

ءاليحان بايمەنوۆ تۇركىستانداعى قۇرىلتايدا تۇراقتى دامۋعا نەگىز بولاتىن قۇندىلىقتار كوتەرىلگەندىگىن ءسوز ەتتى.

«بۇگىنگى تاقىرىپ الەمدىك ۇدەرىستەرگە ساي. سەبەبى، قازىرگى زاماندا جۇرەك قۇندىلىقتارى العا شىعىپ جاتىر. ادام رەسۋرستارىنىڭ ساپاسىن دەنساۋلىق، ءبىلىم، بىلىك انىقتايدى. ال، سول ادامي رەسۋرستار ادامي كاپيتالعا اينالۋى ءۇشىن قۇندىلىقتار ماڭىزدى. بۇگىنگى قۇرىلتايدا جالپى تۇراقتى دامۋعا نەگىز بولاتىن قۇندىلىقتار مەن مادەني-رۋحاني دامۋدىڭ اياسىنداعى ماڭىزدى ماسەلەلەر ءسوز بولدى. پرەزيدەنت وسى ماسەلەلەرگە باسا نازار اۋداردى»، - دەدى ول.