ادىلەتتى قازاقستاندى ادال ازاماتتار قۇرادى - مەملەكەت باسشىسى
«شىن مانىندە، ءبىز ايتىپ جۇرگەن ادىلەتتى قازاقستاندى ادال ازاماتتار قۇرادى. بۇل - ءبىر- بىرىمەن وتە تىعىز بايلانىستى ۇعىمدار. وتانعا، وتباسىنا ادالدىق - پاراساتتىلىق پەن ادامگەرشىلىكتىڭ بەلگىسى. ادال ەڭبەك ەتىپ، ادال تابىس تاپقان ادام جەتىستىككە جەتەدى، قۇرمەتكە يە بولادى. ۇلى اباي «ادال ەڭبەكپەن مال ىزدەمەك - ارلى ادامنىڭ ءىسى» دەگەن. ال، ارلى ادام ادىلەتسىزدىك جاسامايدى. ءار سالادا ادالدىق باستى ورىندا تۇرسا، ءادىل قوعام ورنايدى. جەمقورلىققا جول بەرىلمەيدى، ەل مۇددەسىنە ساي شەشىم قابىلدانادى»، - دەدى مەملەكەت باسشىسى.
سونداي-اق پرەزيدەنت ادال ۇرپاق تاربيەلەۋدىڭ ماڭىزىنا توقتالدى.
«ءبىر سوزبەن ايتساق، قوعامداعى ىزگىلىكتىڭ ءبارى ادالدىقتان باستاۋ الادى. ەندەشە، ادىلەتتى قازاقستان جانە ادال ازامات ۇعىمدارى ەل تىرەگى بولاتىن ەگىز قۇندىلىق رەتىندە ءاردايىم قاتار تۇرۋعا ءتيىس. ادىلەتتى قازاقستاندى قۇرۋ ءۇشىن ءاربىر وتانداسىمىز ادال ازامات بولۋعا ۇمتىلۋى قاجەت. سونىمەن بىرگە، جاس ۇرپاقتى ادال ازامات ەتىپ تاربيەلەۋىمىز كەرەك. ۇلتتىق بىرەگەيلىگىمىزدى نىعايتىپ، ەلىمىزدىڭ جاڭا قۇندىلىقتارىن ورنىقتىرۋ ءۇشىن جۇيەلى جۇمىس جاسالۋعا ءتيىس»، - دەدى قاسىم-جومارت توقايەۆ.
