قاسىم-جومارت توقايەۆ: تۇسىنىكسىز يدەيانى حالىق قابىلدامايدى

استانا. قازاقپارات - تۇركىستاندا ءوتىپ جاتقان ۇلتتىق قۇرىلتايدىڭ نەگىزگى وتىرىسىندا پرەزيدەنت قاسىم-جومارت توقايەۆ كەز كەلگەن تۇجىرىمداما مەن دوكترينانىڭ حالىققا تۇسىنىكتى بولۋى ماڭىزدى ەكەنىن ايتتى، دەپ حابارلايدى قازاقپارات ءتىلشىسى.

«كەز كەلگەن تۇجىرىمداما نەمەسە دوكترينا قاراپايىم ءارى تۇسىنىكتى بولۋى كەرەك. ايتپەسە، ءبارى جاساندى بولىپ شىعادى. ونداي يدەيانى حالىق قابىلدامايدى. ومىرشەڭ، كەلەشەگى زور يدەولوگيالار مەملەكەت پەن قوعامنىڭ ورتاق ىزدەنىسىنىڭ ارقاسىندا عانا پايدا بولادى. ءبىز ءداستۇرلى قۇندىلىقتارىمىزدى قازىرگى مادەني ۇردىستەرمەن ۇيلەستىرۋىمىز كەرەك»، - دەدى مەملەكەت باسشسى.

قاسىم-جومارت توقايەۆ قازاقستاندىق جاستاردى ماقتان تۇتاتىنىن اتاپ ءوتتى.

«ەلىمىزدە وتانشىل، جاسامپاز، باتىل، دارىندى، ءبىلىمدى، وزىق ءارى ەڭبەكقور جاندار وتە كوپ. مەن وسىنداي ازاماتتاردى كورگەندە بولاشاعىمىزدىڭ جارقىن بولارىنا زور سەنىممەن قارايمىن. تاۋەلسىز قازاقستاندا رۋحى ازات، كوزى اشىق، كوكىرەگى وياۋ ۇرپاق ءوسىپ كەلەدى. ولار عىلىم- ءبىلىم، مۋزىكا، كينو، سپورت جانە باسقا دا سالالاردا تابىسقا جەتىپ، بۇكىل الەمگە تانىمال بولا باستادى. جاستارىمىز تۋعان جەردىڭ قايتالانباس ەرەكشەلىگىن جانە تۋعان ەلدىڭ بىرەگەي بولمىسىن جەر جۇزىنە تانىتىپ ءجۇر»، - دەدى پرەزيدەنت.