مەملەكەت باسشىسى: قازاقستان ءبىر جىل بۇرىنعى قالپىنان ايتارلىقتاي وزگەردى

None
استانا. قازاقپارات - پرەزيدەنت قاسىم-جومارت توقايەۆ تۇركىستاندا ءوتىپ جاتقان ۇلتتىق قۇرىلتايدىڭ نەگىزگى وتىرىسىندا ەلدەگى رفەورمالاردىڭ باعدارى وزگەرمەيتىنىن اتاپ ءوتتى، دەپ حابارلايدى قازاقپارات ءتىلشىسى.

«ءبىرىنشى قۇرىلتاي جالپىۇلتتىق رەفەرەندۋمنان كەيىن شاقىرىلدى. سودان بەرى، مىنە، ءبىر جىل ءوتتى. بۇل ادىلەتتى قازاقستاندى قۇرۋ جولىندا ايرىقشا ماڭىزى بار تاريحي كەزەڭ بولدى. ءبىز اتا زاڭىمىزعا ادىلدىك رۋحىن سىڭىرە وتىرىپ، كونستيتۋتسيالىق رەفورما جاسادىق. بۇل وزگەرىستەر مەملەكەتتىگىمىزدىڭ تۇعىرىن بەكىتە ءتۇستى. سونىمەن قاتار، ەلىمىزدىڭ ۇزاق مەرزىمگە ارنالعان دەموكراتيالىق باعدارىن ايقىنداپ بەردى. بيلىكتىڭ باستى ينستيتۋتتارى قىسقا مەرزىم ىشىندە مۇلدە باسقاشا سيپاتقا يە بولدى. شەشىم قابىلداۋ ۇدەرىسىنە ازاماتتاردىڭ قاتىسۋ مۇمكىندىگى ەداۋىر كەڭەيدى. ادام قۇقىقتارى مەن بوستاندىقتارىن قورعاۋ جۇيەسى نىعايدى. وسىنىڭ ءبارى ەلىمىزدىڭ ساياسي قۇرىلىمىن ورنىقتى جانە ءتيىمدى ەتىپ قايتا قۇرۋعا سەپتىگىن تيگىزدى. بارىنشا ءادىل، اشىق ءارى باسەكەگە لايىق جۇيە قالىپتاستى. كەيبىر ادامدار رەفورمالاردىڭ تابىستى بولارىنا كۇمانمەن قاراعان ەدى. ءبىراق، ءبىزدىڭ باعدارىمىز وزگەرگەن جوق. اۋقىمدى ساياسي جاڭعىرۋ جوسپارىن رەت-رەتىمەن جۇزەگە اسىردىق»، - دەدى پرەزيدەنت.

قاسىم-جومارت توقايەۆ ەلىمىز 2-3 جىل بۇرىنعى قالپىنان ايتارلىقتاي وزگەرگەنىن ەسكە سالدى.

«ءبارىمىز ءبىر ەل بولىپ وراسان زور جۇمىس اتقاردىق. قازاقستان وسىدان 2-3 جىل بۇرىنعى، ءتىپتى، ءبىر جىل بۇرىنعى قالپىنان ايتارلىقتاي وزگەردى. ءبىز از ۋاقىتتا زور سەرپىلىس جاسادىق. بۇعان ىنتىماق-بىرلىكتىڭ جانە سىندارلى قوعامدىق ديالوگتىڭ ارقاسىندا قول جەتكىزدىك»، - دەدى مەملەكەت باسشىسى.

ايتا كەتەيىك، بيىل تۇركىستاندا ءوتىپ جاتقان ۇلتتىق قۇرىلتايدىڭ نەگىزگى وتىرىسىنا مەملەكەت باسشىسى قاسىم-جومارت توقايەۆ قاتىسۋدا.

قۇرىلتاي جۇمىس سەكتسيالارىنىڭ وتىرىسى كەشە باستالىپ كەتكەن ەدى.

ۇلتتىق قۇرىلتايدىڭ العاشقى وتىرىسى بىلتىر 16- ماۋسىمدا ۇلىتاۋ وبلىسىندا وتكەن بولاتىن.

سول كەزدە پرەزيدەنت كەلەسى باسقوسۋدى كيەلى تۇركىستاندا وتكىزۋدى ۇسىنعان.


سوڭعى جاڭالىقتار