ۇلكەن الماتى اينالما جولى پايدالانۋعا بەرىلدى

الماتى. قازاقپارات - قازاقستانداعى ءىرى جول- كولىك ينفراقۇرىلىمدارىنىڭ ءبىرى - ۇلكەن الماتى اينالما جولى پايدالانۋعا بەرىلدى، دەپ حابارلايدى قازاقپارات.

كولىك جۇرگىزۋشىلەرى جاڭا جولدىڭ ۇستىمەن ءجۇرىپ، ونىڭ ارتىقشىلىقتارىن باعامداپ كوردى. اتالعان اينالما جول ەل تاريحىنداعى العاشقى كونسەسسيالىق جوبا سانالادى. ونىڭ قۇرىلىسى 3 جىل بۇرىن تۇرىك- كورەيا كونسورتسيۋمىنىڭ نەگىزىندە قولعا الىنىپ، جوسپارعا سايكەس 2024 -جىلى قولدانىسقا بەرىلۋى كەرەك ەدى. دەسە دە قارقىندى جۇمىستاردىڭ ناتيجەسىندە بۇل نىسان مەرزىمىنەن بۇرىن تاپسىرىلىپ وتىر.

ق ر ي ي د م اۆتوموبيل جولدارى كوميتەتىنىڭ ءتوراعاسى تولەگەن ابدۋللين اۆتوجولدىڭ تيىمدىلىگى مەن باسىمدىقتارىن اتاپ ءوتتى. ونىڭ ايتۋىنشا، ۇلكەن الماتى اينالما اۆتوجولى مەگاپوليس كوشەلەرىندەگى جانە قالا ماڭىنداعى كەپتەلىستى ازايتىپ، ەكولوگيالىق جاعدايدى جاقسارتادى.

«بۇل ەلىمىزدىڭ تاريحىنداعى ماڭىزدى ساتتەردىڭ ءبىرى. سەبەبى ۇلكەن الماتى اينالما اۆتوجولى ورتالىق ازياداعى ەڭ ءىرى ينفراقۇرىلىمدىق جوبا سانالادى. وسى جول قۇرىلىسى حالىقتىڭ يگىلىگى ءۇشىن قولعا الىنعانىن اتاپ وتكەن ءجون. سونداي- اق اتالعان جوبا مەگاپوليس تۇرعىندارى مەن جەرگىلىكتى حالىقتىڭ ەركىن قوزعالۋىنا سەپتىگىن تيگىزەرى انىق»، - دەدى تولەگەن ابدۋللين.

كونسەسسيا تەتىگىنە سايكەس قۇرىلىس جۇمىستارىن ينۆەستور جەكە قاراجاتى ەسەبىنەن جۇرگىزگەن. ەندى تاياۋ 16 جىل بويى جول ينۆەستوردىڭ كەپىلدىك مەرزىمىندە بولادى. 66 شاقىرىمعا جالعاسقان اينالما جولدى جارتى ساعاتتا ەڭسەرۋگە بولادى.

الماتى وبلىسىنىڭ اكىمى مارات سۇلتانعازيەۆ اتاپ وتكەندەي، جاڭا جول- كولىك ينفراقۇرىلىمى ءوڭىردىڭ الەۋمەتتىك- ەكونوميكالىق كورسەتكىشتەرىن جاقسارتىپ، حالىقتىڭ ءال- اۋقاتىن ارتتىرۋعا ىقپال ەتپەك.

«اتالعان اينالما اۆتوجولى مەملەكەت- جەكەمەنشىك ارىپتەستىك اياسىندا سالىنعان ەلىمىزدەگى ماڭىزدى ينۆەستيتسيالىق جوبالاردىڭ ءبىرى. ول تۇتاستاي ءوڭىردىڭ ەكونوميكالىق دامۋىنا سەرپىن بەرەتىن باتىس قىتاي - باتىس ەۋروپا ترانزيتتىك ءدالىزىنىڭ نەگىزگى تارماعى سانالادى. وسى جول وبلىسىمىزدىڭ دامۋىنا اسەر بەرىپ، ينۆەستيتسيالىق جانە تۋريستىك الەۋەتتى ارتتىرادى دەگەن سەنىمدەمىز»، دەدى م. سۇلتانعازيەۆ.

اينالما جول 1 А تەحنيكالىق ساناتى بويىنشا سالىنعان. جوبانى قارجىلاندىرۋعا ەۋرازيالىق دامۋ بانكى دە قاتىسقان.

رەسمي بولىمنەن كەيىن جاڭا جولدىڭ بويىمەن بىرنەشە كولىك ءجۇرىپ ءوتتى. اتاپ ايتقاندا، ءۇ ا ا ا ج بەلگىلەرى بار 10 اۋىر جۇك كولىگى، 10 اۆتوبۋس جانە جەڭىل اۆتوكولىكتەر قاسكەلەڭ قالاسىنا دەيىن جول تارتتى.