ا ق ش- تى تاڭعالدىرىپ جۇرگەن قازاق جىگىتى: قازاقستان تۋىن كوتەرسەم دەگەن جوسپار بار
ول مۇحيت اسىپ، سپورتتىق مۇمكىندىكتەرىن جەتىلدىرىپ، جاتتىقتىرۋشى دا بولىپ ءجۇر. Massaget.kz ءتىلشىسى وتانداسىمىزبەن سۇحباتتاستى.
دارحان ا ق ش - تا سپورتپەن اينالىسىپ قانا قويماي، جاتتىقتىرۋ ءىسىن دە قولعا العان.
«ازىرگە رەسمي جاتتىقتىرۋشى ەمەسپىن. قۇجاتتار دايىنداپ جاتىرمىن. ا ق ش- قا بىلتىر جەلتوقساندا كەلدىم. بۇل ەلدى تاڭداۋ سەبەبىم – ا ق ش- تا قاي سالا بولماسىن، ونىڭ ىشىندە، سپورت تا جاقسى دامىعان. ءوزىمنىڭ شامامدى ارتتىرىپ، ءتىل جاعىنان بولسىن ءوزىمدى دامىتۋدى شەشتىم. ا ق ش- تا مۇمكىندىكتەر دە كوپ»، - دەيدى دارحان.
«ءبىراق كەيىنىرەك ناقتى توقتالعانىم - قول كۇرەسى، كروسسفيت، street workout باعىتتارىنا توقتالىپ، سولارمەن اينالىسامىن. ازدى-كوپتى جارىستارعا قاتىسىپ، ءتۇرلى جەتىستىككە جەتتىم. جالپى، ا ق ش دايىندىق مەكتەبى جاعىنان قاتتى دامىعان دەپ ايتا المايمىن. ءبىراق مۇمكىندىك جاعىنان، سپورتشىعا جاسالاتىن جاعداي تۇرعىسىنان الدا. قازاقستانداعى مەكتەپتەن دايىندالىپ كەلىپ، دايىن تاجىريبە مەن وسى ەلدەگى مۇمكىندىكتەردى قوسساق، ۇلكەن جەتىستىكتەرگە جەتۋگە بولادى. سول ويمەن كەلدىم»، - دەپ ەسەپتەيدى قازاقستاندىق.
بۇگىندە دارحان جەرگىلىكتى قازاقستاندىق جىگىتتەرمەن بىرگە سەرفينگپەن دە اينالىسىپ ءجۇر.
«ازىرگە ەندى باستاپ جاتىرمىن. كاسىبي تۇردە اينالىسىپ جۇرگەن قازاق جىگىتتەرمەن بىرگە جاتتىعامىز. بۇل ەلدە سەرفينگپەن اينالىسۋعا بار جاعداي جاسالعان - جاعاجايلار ىڭعايلى، اتلانت مۇحيتىنىڭ تولقىندارى كەرەمەت، سۋدىڭ تەمپەراتۋراسى جاقسى. سەرفينگپەن اينالىسا باستاعان سەبەبىم بالا كەزدەن بەلسەندى دەمالىستى جانىم سۇيەدى. تاۋعا شىعۋ، باسسەينگە شومىلۋ، پاراشيۋتپەن سەكىرۋ سەكىلدى دەمالىستاردى جاقسى كورەمىن. سونىڭ ىشىندە سەرفينگتى دە تەلەديداردان كورىپ، قىزىعاتىنمىن. ءبىراق قازاقستاندا ونىمەن اينالىسۋعا مۇمكىندىك جوق. ا ق ش- قا كەلگەلى سول قىزىعۋشىلىعىمدى دا قولعا الدىم، بالكىم وسى سالادا دا جەتىستىكتەرگە جەتەرمىن»، - دەيدى دارحان.
دارحان سپورتقا قاتىستى ءتۇرلى قيىندىق كەز كەلگەن ۋاقىتتا بولىپ تۇراتىنىن ايتادى. ءبىراق ول، ارينە، اۋىز تولتىرىپ ايتاتىن قيىندىق ەمەس.
«بىردە جارىس بولاتىنىن ەستىپ كەلگەن ەدىم. شەتەلدەن قاتىسۋشى مەن عانا بولدىم. قالعانى جەرگىلىكتى، قارا ءناسىلدى جىگىتتەر بولدى. ولار وتە مىقتى. مەن ولاردى جەڭە باستادىم، ءبىراق ولار تىم كوپ بولىپ، مەن ولارعا ۇناماي قالدىم. ولار تىرىسقانىمەن سول بويى جەڭە المادى»، - دەيدى دارحان.
ول ا ق ش- تاعى ءومىردىڭ ارتىقشىلىعى دا، كەمشىن تۇستارى دا بارىن ايتادى.
«ءبارى جاقسى، ارينە. ءتىل مەڭگەرۋ، سپورت، تابىس جاعىنان دا دامۋعا تىرىسىپ جاتىرمىز. ۇنامايتىن تۇسى - وتباسىڭدى ەشتەڭە دە، ەشكىم دە الماستىرا المايدى. ەڭ قيىنى - سول. تۋعان جەرگە دە ەشتەڭە جەتپەيدى. ونى شەت ەلدە تۇرىپ جاتقاندار تۇسىنەر. ەلدى ساعىناسىڭ»، - دەيدى ول.
دارحان ا ق ش- تا تۇپكىلىكتى قالۋ ويىندا جوعىن، قازاقستانعا ورالاتىنىن ايتادى.
«ا ق ش- تا جوسپارلارىمدى ورىنداپ، ەلگە قايتۋ كەرەك. تارازداعى سپورت مەكتەبىندە قول كۇرەستەن اعا جاتتىقتىرۋشى بولىپ جۇمىس ىستەگەنمىن. ەلدە جاتتىقتىرۋشى بولىپ جۇرگەن كەزدە وقۋشىلارىم الەم، ازيا چەمپيونى بولعان. سول سەكىلدى وسى جاقتان دا سپورتشىلار دايىنداپ، ەلدە جيناعان تاجىريبەمدى بولىسكىم كەلەدى. دۋلاتي اتىنداعى ۋنيۆەرسيتەتتە مۇعالىم بولدىم.
ايتىپ وتكەنىمدەي، ا ق ش- تا تاجىريبە جيناپ، ەلگە قايتقاندا سول تاجىريبەمەن جاستاردى ۇيرەتىپ، ءبولىسۋ قاجەت. الداعى 2-3 جىلىم ا ق ش- پەن بايلانىستى بولعانىمەن ودان كەيىنگى ءومىرىم قازاقستانمەن بايلانىستى بولادى. ا ق ش- تىڭ پايدالى تۇسىن الىپ، قازاقستانمەن ءبولىسۋ قاجەت. ماقساتتارىمنىڭ ءبىرى – وسى».
وتانداسىمىز ا ق ش- تا بىرنەشە جارىسقا قاتىسىپ ۇلگەرگەن. ونىڭ ىشىندە جۇلدەلى ورىنداردى دا يەلەنگەن.
«پەنسيلۆانيا شتاتىندا قول كۇرەستەن تۋرنير ءوتىپ، ءبىرىنشى ورىن يەلەنگەن بولاتىنمىن. برۋكليندە ستريتليفتينگتەن جارىستا دا ءبىرىنشى ورىن الدىم. سونىمەن قاتار، جاقىندا نيۋ-دجەرسيدە كروسسفيت جانە ستريتليفتينگتەن وتكەن جارىستا جۇلدەلى ورىن يەسى اتاندىم. ءالى دە دايىندالىپ جاتىرمىن. جەرگىلىكتى سپورت ۇيىمدارى مەن اسسوتسياتسيالارمەن بايلانىستى ۇزبەي ءجۇرمىن. كەلەسى جىلى ارنولد شۆارتسەنەگگەردىڭ ۇلكەن ءتۋرنيرى بولادى. ول جەرگە الەمنەن ادامدار كەلىپ قاتىسادى. بۇيىرسا سول جارىستا قازاقستان تۋىن كوتەرسەم دەگەن جوسپار بار».
دارحان كەيدە قازاقستان تۋرالى ەستىمەگەن ادامدار دا كەزدەسىپ جاتاتىنىن ايتادى.
«گولوۆكين الەمگە ايگىلى بولعانىمەن بوكسقا مۇلدە قىزىقپايتىن ادامدار بار. ديماش تا تانىمال بولعانىمەن انگە قىزىقپايتىندار دا بولادى. ازدى- كوپتى مەن ارقىلى قازاقستاندى تانىپ جاتاتىندار بار. بەلگىلى ءبىر جەڭىسكە جەتكەننەن كەيىن مەنىڭ قايدان كەلگەنىمدى سۇراپ قىزىعىپ جاتاتىندار بولادى. از بولسا دا قازاقستاندى تانىپ جاتىر. «كوپ تۇكىرسە – كول» دەمەكشى ۇلەسىمدى ازداپ قوسىپ جاتىرمىن دەپ ويلايمىن. ءارقايسىمىز ەلىمىزدى تانىتۋعا ۇلەس قوسساق تا جاقسى عوي. سول ماقساتپەن دە ءجۇرمىن. بۇل جەردە اعا-كوكە دەگەن جوق. بىرتىندەپ كەلە جاتىرمىز. قازاقستاندى، قازاقتاردى جاقسى تۇسىنان كورسەتۋگە تىرىسامىز»، - دەيدى دارحان.
