جاس وسپىرىمدەردى جاتتىقتىرۋ ءۇشىن جاپون باپكەرلەرى تارتىلادى - دزيۋدو فەدەراتسياسى

استانا. قازاقپارات – ب ا ق وكىلدەرىنىڭ قاتىسۋىمەن وتكەن بريفينگىدە قازاقستان دزيۋدو فەدەراتسياسىنىڭ باس حاتشىسى اسحات جىتكەيەۆ بالالاردى جاتتىقتىرۋ ءۇشىن جاپون باپكەرلەرىن تارتۋ جوسپارلانعانىن ايتتى، دەپ حابارلايدى قازاقپارات ءتىلشىسى.

«30 جىلدا ءبىز ءالى التىن مەدال (دزيۋدو سپورتىنان - اۆتور تۇسىندىرمەسى) المادىق. جەڭىسكە جەتۋ ءۇشىن جان جاقتان ءبىلىم جيناۋ قاجەت. سول ءۇشىن فرانسۋز مامانداردى الىپ كەلدىك. سونىمەن قاتار، جاپون باپكەرلەرىن شاقىرۋ جوسپاردا بار. ءبىر رەت وسى ەلدەن مامان العان بولاتىنبىز. دەگەنمەن ونىڭ ءبىزدىڭ قۇراماعا ىڭعايى كەلمەدى. سوندىقتان ءبىز جاس وسپىرىمدەر جانە بالالاردى جاتتىقتىرۋ ءۇشىن جاپون باپكەرلەرىن ىزدەپ ءجۇرمىز»، - دەپ توقتالدى اسحات جىتكەيەۆ.

بۇعان قوسا، سپيكەر وليمپيادا ويىندارىنا قاتىستىرۋ ءۇشىن قازاقستان وزگە ەلدەردەن لەگيونەر المايتىنىن باسا ايتتى.

«ءوزىمىزدىڭ ەلدە 90 مىڭ دزيۋدوشى بار. لەگيونەر الۋ ويدا جوق. باسىمدىقتى ەل سپورتشىلارىنا بەرەمىز. سول ءۇشىن دە تەك شەتەلدەن باپكەر الدىرتىپ جاتىرىمىز. ءوزىمىزدىڭ قاراپايىم جىگىتتەرىمىز بەن قاراكوز قىزدارىمىزعا بار تاجىريبەنى بەرىپ، جەمىسىن كورەمىز دەپ سەنەمىن»، - دەپ پىكىر قوستى اسحات جىتكەيەۆ.

ەسكە سالا كەتەيىك، 16-18-ماۋسىم ارالىعىندا استانادا دزيۋدودان «Qazaqstan Barysy Grand Slam» ءتۋرنيرى وتەدى. وعان الەمنىڭ 42 ەلىنەن كەلگەن 300 دەن استام سپورتشى قاتىسادى.