ستۋدەنتتەردى اسكەردەن بوساتۋ، ولاردىڭ بورىشىن وتەۋگە دەگەن نيەتىن بۇزدى - دەپۋتات

None
استانا. قازاقپارات - ءماجىلىس دەپۋتاتى ەربولات ساۋرىقوۆ جاستاردىڭ اسكەري مىندەتىن وتەۋى جولىنداعى كەدەرگىلەر مەن پروبلەمالاردى اتادى، دەپ حابارلايدى قازاقپارات ءتىلشىسى.

«بىرىنشىدەن، ەلىمىزدە جاستار ساياساتى ماسەلەسى مەن ۇلتتىق يدەولوگيا اقساپ تۇر. ەكىنشىدەن، جاستاردىڭ بويىندا وتانعا دەگەن سۇيىسپەنشىلىك پەن پاتريوتتىق تاربيە جوقتىڭ قاسى. ۇشىنشىدەن، وتباسى مەن مەكتەپ تاربيەسى، قوعامدىق ورتا مەن جۇمىس ورنىنداعى تاربيە تومەندەپ كەتكەن. تورتىنشىدەن، كوللەدجدەر مەن ج و و قابىرعاسىندا كۇندىزگى وقۋ فورماسىنداعى جاستاردى اسكەردەن بوساتۋ - جاستارىمىزدىڭ وتان الدىنداعى بورىشىن وتەۋگە دەگەن نيەتىن بۇزىپ وتىر»، - دەدى ەربولات ساۋرىقوۆ ماجىلىستە وتكەن ءىس- شارانى اشا وتىرىپ.

دەپۋتات كوتەرگەن بەسىنشى پروبلەما جاستارىمىزدىڭ بويىندا وتان الدىنداعى بورىشىن وتەۋ كەرەكتىگىن ۇمىتىپ، ساناسىندا جەڭىل قارجى مەن تابىس تابۋ سياقتى ويلار باسىمدىققا يە بولىپ العان.

«التىنشىدان، ءدىني اعىمداعى قىزمەتكەرلەر مۇلدەم الىنبايدى، ال وزگە ۇلت وكىلدەرى كوبىنەسە اسكەرگە بارۋدان باس تارتادى. جەتىنشىدەن، مەملەكەتتىك قىزمەت پەن وعان تەڭەستىرىلگەن ازاماتتار، قۇقىق قورعاۋ سالاسىنا جۇمىسقا تۇرۋشىلار مىندەتتى تۇردە اسكەردەن كەيىن عانا جۇمىسقا الىنۋى مىندەت دەگەن باستى قاعيدا ورىندالمايدى. سەگىزىنشىدەن، قازىرگى اسكەردەگى كەلەڭسىز وقيعالار: كۇش كورسەتۋ، قارجى تالاپ ەتۋ، ەرىكسىز جۇمىسقا شەگۋ، ادىلەتسىزدىك ورناتۋ، ادام ءولىمى مەن ءتۇرلى سۋيتسيدتەر جاستاردىڭ اسكەرگە بارماۋىنىڭ باستى سەبەبى بولىپ وتىر»، - دەپ تارقاتىپ بەردى حالىق قالاۋلىسى.

ايتا كەتەيىك، بۇگىن ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىندە مەرزىمدى اسكەري قىزمەت وتەگەن ساربازدارعا ءبىلىم بەرۋ جانە وزگە دە جەڭىلدىكتەر تەتىگىن ىسكە اسىرۋ ماسەلەلەرى قارالدى.

اۆتور:

داۋلەت ىزتىلەۋ

سوڭعى جاڭالىقتار