زاڭسىز اكتيۆتى ءوز ەركىمەن قايتارعاندار نەگە قىلمىستىق جاۋاپقا تارتىلمايدى - ءماجىلىس سپيكەرىنىڭ جاۋابى
«مەملەكەتتەگى ەڭ وزەكتى بولىپ تۇرعان ماسەلە - كەزىندە جىمقىرىلعان دەيمىز بە، زاڭسىز شىعارىلعان دەيمىز بە، سول كلەپتوكراتتىڭ شىعارعان قىرۋار قارجىسىن ەلگە قايتارۋ. ول قانداي جولمەن قايتارىلادى؟ وسى ماسەلە وسى زاڭدا قاراستىرىلعان. بۇل جەردە مۇمكىن بۇرىنعى ستاندارتتارعا كەلمەيتىن تۇستار دا بار شىعار. سەبەبى بۇل جاعدايدىڭ ءوزى دە ستاندارتقا ساي جاعداي ەمەس، شىنىن ايتساق. سوندىقتان بۇل زاڭ، ءبىرىنشى كەزەكتە، نەنى رەتتەيدى؟ ءبىزدىڭ شەتەلگە شىعارىپ كەتكەن ءىرى كلەپتوكراتتاردىڭ قارجىلارىن ەلگە قايتارۋدى رەتتەيدى. بىرىنشىدەن، وسى زاڭ بويىنشا رەەستر قۇرىلادى. سول رەەستردە ءوزىڭىز ايتقان ازاماتتاردىڭ ءتىزىمى جاسالادى. ەكىنشىدەن، ول ازاماتتار ول قارجىنى ءوز ەركىمەن قايتارامىز دەيتىن بولسا، قىلمىستىق جاۋاپكەرشىلىكتەن بوساتىلادى. بىزدە بۇگىن ءبىرىنشى كەزەكتەگى ماسەلە - قارجىنى قايتارۋ» ، - دەدى ەرلان قوشانوۆ.
پالاتا سپيكەرىنىڭ پايىمىنشا، مۇنداي شارت كونستيتۋتسياعا قايشى ەمەس.
«بۇل - زاڭمەن رەتتەلەتىن ماسەلە. قارجىنى قايتارۋ دەگەن دە وڭاي ماسەلە ەمەس قوي. ەگەر ءبىز جاڭاعى ءوزىڭىز ايتقان قولدانىستاعى زاڭدار بويىنشا، ستاندارتتى جولدارمەن جۇرەتىن بولساق، وتە ۇزاق ۋاقىت الادى. ونداي اقشانى شىعارعان ادامدار باي ادامدار عوي. ولار الەمدىك دەڭگەيدەگى ەڭ مىقتى ادۆوكاتتاردى جالدايدى، سوتتاسادى. شەت مەملەكەتتەردىڭ الدىندا سولاردىڭ زاڭدارى بويىنشا دالەلدەۋىمىز كەرەك. سوندىقتان بۇل وتە ۇزاق مەرزىم الاتىن پروتسەسس. وسى زاڭ بويىنشا ءتيىستى كوميسسيا قۇرىلادى. سول كوميسسيانىڭ جۇمىسىنا تەك قۇقىق قورعاۋ ورگاندارىنىڭ نەمەسە مەملەكەتتىك ورگانداردىڭ ءبىرىنشى باسشىلارى عانا ەمەس، ازاماتتىق قوعامنىڭ دا مۇشەلەرى كىرەدى. سونىمەن قاتار، دەپۋتاتتار كىرەدى. بۇل دا ءبىر اشىقتىق دەپ ەسەپتەيمىن. ءبىز قانداي جولمەن بولسا دا، سول قارجىنى قايتارۋ ءۇشىن ارەكەت جاساپ جاتىرمىز. بۇل زاڭ ەل يگىلىگى ءۇشىن جۇمىس ىستەيتىن زاڭ بولادى دەپ ويلايمىن»، - دەدى ءماجىلىس ءتوراعاسى.
