ترامپقا قاتىستى سوت وتىرىسى باستالدى

None
استانا.قازاقپارات - بۇگىن ا ق ش- تىڭ 45-پرەزيدەنتى دونالد ترامپقا قاتىستى سوت پروتسەسى باستالدى. پروكۋرورلار ونى مەملەكەتتىك اسا قۇپيا قۇجاتتاردى، قاساقانا جاسىردى جانە جاريا ەتتى دەپ ايىپتادى.

جالپى ەكس- پرەزيدەنتكە قاتىستى 37 قىلمىستىق ءىس قوزعالعان. ترامپ سوت بارىسىندا، ءوزىنىڭ كىناسىز ەكەنىن مالىمدەدى. قالاي بولسا دا ترامپ ۇستىنەن فەدەرالدىق دەڭگەيدە، قىلمىستىق ءىس قوزعالىپ، ايىپ تاعىلعان ا ق ش- تىڭ العاشقى پرەزيدەنتى رەتىندە تاريحتا قالماق.

نۇربەك بەكەن، ءتىلشى:

- دونالد ترامپقا ۇلتتىق قاۋىپسىزدىككە بايلانىستى قۇپيا قۇجاتتاردى جاريالاۋ جانە جاسىرۋ بويىنشا قىلمىستىق ءىس قوزعالعان. مايامي سوتىنا كەلگەن بۇرىنعى پرەزيدەنت بىردەن وقشاۋلانىپ، قوس قاپتالىنا كۇزەت قويىلدى. بۇل ايىپتاۋدى تىڭدايتىن ادامعا جاسالاتىن ءتارتىپ. سوت الدىندا ءبارى تەڭ. ترامپ ەكى ادۆوكاتپەن كەلدى. قالعان ءۇش قورعاۋشىسى مەملەكەتتىك دەڭگەيدە ايىپ تاققان سوڭ، ارى قاراي جۇمىس ىستەۋدەن باس تارتقان. سوت بۇگىنگى وتىرىستى تۇسىرۋگە جانە تىكەلەي حابار تاراتۋعا تىيىم سالدى.

دجەيمس سەمپل، كونستيتۋتسيالىق قۇقىق پروفەسسورى:

- مەنىڭ ويىمشا، بۇل سوت زاڭ ۇستەمدىگىنىڭ دالەلى. ءاربىر ادام ارەكەتىنە جاۋاپ بەرۋى ءتيىس. دەسە دە، ەگەر قاراپايىم ازامات وسى ايىپتاۋ اكتىسىندە ايتىلعان قىلمىستاردى جاساعان بولسا، وندا ول بوستاندىق دەگەندى مۇلدەم ۇمىتار ەدى. ال بۇل جەردە ءىس دونالد ترامپقا قاتىستى بولعان سوڭ ادىلەت دەپارتامەنتى اسا ساقتىق تانىتىپ جاتىر.

نۇربەك بەكەن، ءتىلشى:

- سوت الدىندا 40 مينۋتتاي وتىرعان ترامپ ەشقانداي شارتسىز ۇيىنە جىبەرىلدى. ونىڭ ءجۇرىپ- تۇرۋىنا ەشقانداي شەكتەۋ دە قويىلعان جوق. ادەتتەگىدەي ميلليونداپ كەپىل اقشا قويۋ تۋرالى تالاپ تا جاسالمادى. ءبىراق وسى ىسكە قاتىستى كۋاگەرلەرمەن جانە ءوزىنىڭ كومەكشىسىمەن بايلانىسۋعا تىيىم سالىندى. 46 بەتتەن تۇراتىن تەرگەۋ اكتىسى بويىنشا ەكس- پرەزيدەنت قۇپيا قۇجاتتاردى قاساقانا جاسىردى جانە ونى كورۋگە قۇقى جوق ادامدارعا جاريالادى، تەرگەۋ ىسىنە كەدەرگى جاسادى دەپ ايىپتالىپ وتىر. انت بەرىپ جالعان سويلەدى دەگەنى تاعى بار. ەندى ترامپتىڭ تاعدىرى ون ەكى ادامنان تۇراتىن القابيلەر توبىنا بايلانىستى. سوت ۇكىم شىعارۋ ءۇشىن ون ەكىسى دە ءسوزسىز ترامپتى كىنالى دەپ تابۋى كەرەك. ءتىپتى ءبىر ادام كۇمان كەلتىرسە، سوت قاراۋى توقتاتىلادى. نەاما راحماني - بۇرىنعى فەدەرالدىق پروكۋرور «ءادىل جانە بەيتاراپ القابيدى تابۋ وڭايعا سوقپايدى. ا ق ش- تاعى ءاربىر ادام بۇل ىستەن حاباردار جانە دونالد ترامپ تۋرالى ءبىرجاقتى ويدا. سوندىقتان ءوز پىكىرىن ەمەس، زاڭدى باسشىلىققا القابيلەر تابۋ مىندەتى تۇر

نۇربەك بەكەن، ءتىلشى:

- دەگەنمەن، سوڭعى ەكى ايدا ەكى رەت سوتقا تارتىلعان تامپتىڭ جاقتاۋشىلارى ارتىپ بارادى. ساۋالناما بويىنشا رەسپۋبليكاشىلداردىڭ 81 پروتسەنتى قىلمىستىق ءىستىڭ ساياسي استارى بار دەپ ەسەپتەيدى. سوندىقتان دونالد ترامپ 2024-تەگى پرەزيدەنت سايلاۋى الدىنداعى ۇگىت ناسيحات ناۋقانى ءۇشىن ۇتىمدى پايدالانىپ جاتىر. ساراپشىلار بولسا، ەكس پرەزيدەنت سوت پروتسەسىن مۇمكىندىگىنشە ساياسي ناۋقان وتكەنشە سوزۋعا تىرىسادى دەپ سانايدى. سەبەبى بۇگىن 77 جاسقا تولعان ترامپتى كەلەر جىلى وتەتىن پرەزيدەنت سايلاۋىندا جەڭىسكە جەتسە، قىلمىستىق ءىستى توقتاتىپ تاستاۋعا نە ايىپتى دەپ تانىلىپ جاتسا وزىنە راقىمشىلىق جاساۋعا قۇقى بار. قالاي بولسا دا ترامپ ۇستىنەن فەدەرالدىق دەڭگەيدە قىلمىستىق ءىس قوزعالىپ، ايىپ تاعىلعان ا ق ش- تىڭ العاشقى پرەزيدەنتى رەتىندە تاريحتا قالماق.

www.24.kz

سوڭعى جاڭالىقتار