سەرگەي ارحيپوۆ ءورت كەزىندە قازا بولعانداردىڭ تىزىمىنە ەنگىزىلمەيدى - باس پروكۋراتۋرا
«سەرگەي ارحيپوۆتىڭ دەنەسى مەن تراكتورى ءورت بولعان اۋماقتان باسقا جەردە تابىلدى. ول ءورت سالدارىنان قازا بولماعان»، - دەدى ج. ومىراليەۆ بۇگىن ءماجىلىستىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
بۇل تۇرعىدا ول س. ارحيپوۆ ءورت كەزىندە مەرت بولعان 14 ادامنىڭ ساناتىنا كىرمەگەنىن ايتتى.
«مەملەكەت باسشىسى زارداپ شەككەندەرگە جان- جاقتى كومەكتەسۋ تاپسىرماسىن بەردى. سوندىقتان بۇل باعىتتاعى كومەك كورسەتۋدى وبلىستىق اكىمدىك، كاسىپكەرلەر قاراستىرادى»، - دەدى جاندوس ومىراليەۆ.
ەستەرىڭىزگە سالا كەتسەك، Instagram-داعى پاراقشالاردىڭ بىرىندە سەرگەي ارحيپوۆ اباي وبلىسى اۋماعىنداعى ءورتتى سوندىرۋگە كومەكتەسۋ ءۇشىن تراكتورىمەن شىعىپ كەتىپ، ءىز- ءتۇزسىز كەتكەنى تۋرالى اقپارات تاراعان بولاتىن. ول سوڭعى رەت 9-ماۋسىم كۇنى حابارعا شىققان.
الدىمەن ونىڭ تراكتورى تابىلدى. كەيىن، 10-ماۋسىم كۇنى 36 جاستاعى س. ارحيپوۆتىڭ دەنەسى انىقتالدى. جۇرگىزىلگەن سوت- مەديتسينالىق ساراپتامانىڭ قورىتىندىسىنا سايكەس ەر ادامنىڭ ءولىمى جۇرەك اۋرۋىنان - كارديوميوپاتيادان بولعانى انىقتالدى.
