كۇدەبايەۆتىڭ شەكارادان قالاي ءوتىپ كەتكەنى بەلگىلى بولدى

None
استانا. قازاقپارات - باس پروكۋروردىڭ ورىنباسارى جاندوس ومىراليەۆ سەرىك كۇدەبايەۆتىڭ قىرعىز ەلىنە قالاي ءوتىپ كەتكەنىن ايتتى، دەپ حابارلايدى قازاقپارات ءتىلشىسى.

«ول شەكارامىزدان تىس جەردەن قىرعىز مەملەكەتىنە ءوتىپ كەتكەن. شەكاراعا جەتكىزگەن كولىك جۇرگىزۋشىسىنە دە ونىڭ مۇنداي ارەكەتكە باراتىنى بەلگىلى بولعان. سول سەبەپتى ءوزى دە جاۋاپكەرشىلىككە تارتىلىپ جاتىر. ول (كۇدەبايەۆ) شەكارانىڭ وتكىزۋ پۋنكتىنەن وتپەگەن. كەگەن اۋدانىندا شەكارا تەمىر تورىنىڭ استىن كوتەرۋ ارقىلى ءوتىپ كەتكەن»، - دەدى ول ءماجىلىستىڭ جالپى وتىرىسىنان كەيىن ب ا ق وكىلدەرىنىڭ ساۋالىنا وراي.

ونىڭ اتاپ وتۋىنشە، وسى جايتقا بايلانىستى سەرىك كۇدەبايەۆتىڭ ۇستىنەن مەملەكەتتىك شەكارانى زاڭسىز كەسىپ وتكەنى ءۇشىن قوسىمشا قىلمىستىق ءىس قوزعالعان.

ەسكە سالايىق، الماتى وبلىستىق پوليتسيا دەپارتامەنتىنىڭ ەكس- باسشىسى سەرىك كۇدەبايەۆ قاڭتار وقيعاسى بويىنشا 10 جىلعا سوتتالعان بولاتىن. ءبىراق ول سوت ۇكىمىمەن كەلىسپەي، اپەللياتسياعا بەردى.

سوڭعى جاڭالىقتار