ت ج د الماتى تۇرعىندارىنا ءورت قاۋىپسىزدىگىنە بايلانىستى ەسكەرتۋ جاسادى

الماتى. قازاقپارات – الماتىدا 14-16- ماۋسىم ارالىعىندا جوعارى ءورت قاۋپى ساقتالادى، دەپ حابارلايدى قازاقپارات ءتىلشىسى.

الماتى قالاسىنىڭ توتەنشە جاعدايلار دەپارتامەنتى قازگيدرومەتتىڭ اۋا رايىنا بايلانىستى ەسكەرتۋى نەگىزىندە 14-16- ماۋسىم ارالىعىندا قالادا جوعارعى ءورت قاۋىپى ساقتالاتىنىن حابارلادى.

وسىعان وراي، ۆەدومستۆو قالا تۇرعىندارى مەن قوناقتارىنا تاۋلى-ورماندى القاپتارعا بارعاندا ءورت قاۋىپسىزدىگى ەرەجەلەرىنىڭ تالاپتارىن ساقتاۋعا شاقىردى.

«تاماق جاساۋ ءۇشىن ارنايى اس ءپىسىرۋ قۇرىلعىلارىن قولدانۋ؛

- تەمەكى شەكپەۋ، تۇتانعان سىرىڭكە جانە تەمەكى قالدىقتارىن تاستاماۋ؛

- كۇن ساۋلەسىندە بوتەلكەلەردى، شىنى سىنىقتارىن، باسقا دا تۇرمىستىق قالدىقتاردى قالدىرماۋ جانە ءشوپتىڭ ۇستىنە وت جاقپاۋ قاجەت»، - دەپ ەسكەرتتى ت ج د- دا.